Ərdoğan və Abbas Qəzzaya humanitar yardımın çatdırılmasını müzakirə edəcəklər, Türkiyədəki diplomatik mənbəi xəbər verir

Reuters:  Türkiyədəki diplomatik mənbə bazar ertəsi bildirib ki, prezident Rəcəb Tayyib Ərdoğan bu həftə Ankarada danışıqlar zamanı Fələstin prezidenti Mahmud Abbasla Türkiyənin Qəzzaya humanitar yardım çatdırmaq imkanını müzakirə etmək niyyətindədir.

Həftə sonu Türkiyədə diplomatik forumda çıxış edən Fələstin xarici işlər naziri Riyad əl-Maliki Abbasın çərşənbə axşamı Ankaraya səfər edəcəyini və Ərdoğanla görüşəcəyini bildirib.

Qəzzaya hücumlarına görə İsraili kəskin tənqid edən və onun Dünya Məhkəməsində soyqırım iddiası ilə mühakimə olunması səylərini dəstəkləyən Türkiyə dəfələrlə atəşkəs çağırışı edib. Amma Ankara birbaşa olaraq atəşkəs danışıqlarında iştirak etmir.

Qərb müttəfiqləri və bəzi Körfəz ölkələrindən fərqli olaraq, NATO üzvü Türkiyə Qəzzaya nəzarət edən və oktyabrın 7-də İsrail ərazisinə hücumu həyata keçirən Fələstin silahlı qruplaşması olan HƏMAS-a terror təşkilatı kimi baxmır.

Diplomatik mənbə bildirib ki, Ərdoğan və Abbas Qəzzadakı son hadisələri, eləcə də İordan çayının qərb sahilindəki vəziyyəti müzakirə edəcəklər.

"Türkiyə İsrailin hücumları başlayandan Misirlə koordinasiyalı şəkildə Qəzzaya geniş humanitar yardım çatdırır... Bu kontekstdə prezident Abbasla görüşlərdə humanitar yardım əməliyyatları da müzakirə olunacaq", - mənbə bildirib.