Gürcüstanda birinci koronavirus hadisəsi qeydə alınıb

Bakı/27.02.20/Turan: Gürcüstanda birinci koronavirus hadisəsi qeydə alınıb.Bu barədə xüsusi brifinqdə səhiyyə və sosial müdafiə naziri Yekaterina Tikaradze bildirib.

Nazirin sözlərinə görə, virus Azərbaycandan tranzitlə İrandan gələn Gürcüstan vətəndaşı,  50 yaşlı kişidə qeydə alınıb. Xəstə hazırda Yoluxucu xəstəliklər xəstəxanasına yerləşdirilib. Onun vəziyyəti qənaətbəxş olaraq qiymətləndirilir.

Nazirin sözlərinə görə, hökumət Gürcüstanda epidemiyanın başlamasına mane olmaq üçün əlindən gələni edir.

"Bildirmək istəyirəm ki, vətəndaş sərhəddə tamamilə müvafiq şəkildə təchiz edilmiş sərhədçilərimiz tərəfindən yoxlanılıb. Belə ki, onların sağlamlığı bizim üçün çox vacibdir. Onlar bizim bütün tapşırıqlarımızı yerinə yetirirlər. Bu, onların xəstələnmə riskini azaldır, amma, buna baxmayaraq, biz hazırda gömrükçülərimizə də nəzarət edirik və onlar karantin sahəsinə keçiriləcəklər.

Hazırda xəstə ayrı sahəyə yerləşdirilib, indiki mərhələdə onun sağlamlığı üçün heç bir təhlükə yoxdur. Həmvətənlərimizi sakitləşdirmək istəyirəm - panika üçün əsas yoxdur, belə ki, Gürcüstanda koronavirus epidemiyasının yayılmaması üçün hökumətimiz əlindən gələni edir və bütün tədbirləri görür", deyə nazir bildirib.

Xəstəliklərə Nəzarət Mərkəzinin direktoru Amirka Qamkrelidze bildirib ki, yeni tip koronavirus diaqnozu qoyulan şəxs müvafiq şəkildə müalicə olunur.

"İlk hadisə təsdiq edilib. Bir saat əvvəl laborator müayinə başa çatıb. Tamamilə əmin olmaq üçün biz bu reaksiyanı üç dəfə təkrarladıq. Söhbət İrana gedib Gürcüstana qayıdan Gürcüstan vətəndaşından gedir və o, müvafiq müayinələrdən keçirilib. Məlum olduğu kimi, Çində ortaya çıxan virus bu gün başqa ölkələrdə, o cümlədən də İranda yayılıb. Bu günə qədər bu ölkədə 19 nəfər həlak olub, 85 nəfər xəstəliyə yoluxub", deyə Qamkrelidze bildirib.