İstanbulda keçirilən Fələstinli qadınlara dəstək aksiyası Türkiyənin başqa bölgələrində davam etdiriləcək

İstanbul/25.10.23/Turan: Turan İnformasiya Agentliyinin məlumatına görə,Fələstinli Qadınlarla Həmrəylik Təşəbbüsü adlı təşkilat İstanbulun tarixi səmtlərindən biri olan Eminönü meydanında İsrailin qadınları, uşaqları və yaşlıları qətlə yetirməsinə qarşı etiraz aksiyası keçirib.

3 gün davam edən aksiyanın iştirakçıları İsrailin qadınları,uşaqları və yaşlıları qətlə yetirməsinə yerdə oturaraq etiraz ediblər. İctimaiyyətin və bölgədəki əcnəbilərin yaxından maraq göstərdiyi etiraz aksiyası  heç bir insident olmadan başa çatıb.

Fələstinli Qadınlarla Həmrəylik Təşəbbüsü-nün təşkil etdiyi və 40-dan artıq QHT-nin dəstəklədiyi aksiya ilə bağlı  Turan Agentliyinə açıqlama verən Hatice Karasakız  deyib: ”Türkiyənin ən böyük QHT-lərindən birinin dəstəyi ilə Fələstində qadınların,uşaqların və yaşlıların qətlə yetirilməsinə qarşı etiraz aksiyaları təşkil edirik. Bundan əvvəlki aksiyalarımız kimi Eminönü-ndə keçirdiyimiz 3 günlük aksiyanı  Türkiyənin digər şəhərlərində də keçirəcəyik. İsrailin rəhmsiz bombardmanlarından ən çox zərəri, təəssüf ki, qadınlar, uşaqlar və yaşlılar görür. Biz daha əvvəl İsrail həbsxanalarındakı Fələstinli qadınlara edilən zülmlərə qarşı etiraz aksiyaları keçirərək onların səsini dünyaya çatdırmışdıq. Bu gün Qazzə əhalisi yeni bir zülmlə üzbəüz qalıb. Türkiyə bu məsələdə Fələstinə təminatçı olmağı təklif edib.Biz də bu təklifi dəstəkləyirik. İcazə versələr, bir an əvvəl, Qazzəyə gedib zülmə məruz qalan qadınlara,uşaqlara,yaşlılara kömək edərik. Bir an əvvəl atəşkəs elan edilsin, mülki əhali ölməsin”.

Fələstinli qadınlara dəstək məqsədiylə keçirilən 3 günlük etiraz aksiyasının öz məqsədinə çatdığını bildirən Hatice Karasakız siyasi dünyagörüşündən asılı olmayaraq, dünya miqyasında qadınların haqlarıyla məşğul olan  Qeyri-Hökumət Təşkilatlarını, müxtəlif ölkələrdəki qadın idarəçiləri və siyasətçiləri etiraz səslərini yüksəltməyə çağırıb.--0-