Nepal Rusiyadan Ukraynaya döyüşmək gedən nepallı əsgərləri və öldürülənlərin cəsədlərini geri göndərməyi xahiş edir

AP:  Nepalın baş diplomatı cümə axşamı bildirib ki, Nepal Rusiyadan Ukraynaya qarşı döyüşmək üçün cəlb edilmiş yüzlərlə Nepal vətəndaşını və münaqişədə həlak olanların cəsədlərini geri qaytarmağı xahiş edib.

Nepalın xarici işlər naziri Narayan Prakaş Saud “Associated Press”ə bildirib ki, Rusiya ordusu Ukraynada döyüşmək üçün 200-dən çox Nepal vətəndaşı cəlb edib və onlardan ən azı 14-nün orada öldüyü təxmin edilir.

“Biz Rusiyadan Nepal vətəndaşlarının orduya cəlb olunmasını dərhal dayandırmasını, orduda xidmət edənlərin dərhal geri qaytarılmasını, həlak olanların cəsədlərinin vətənə qaytarılmasını, döyüşlər zamanı yaralananların müalicəsini və geri qaytarılmasını xahiş etmişik”, - deyə Saud bildirib.

Onun sözlərinə görə, Nepal Rusiyadan döyüşlər zamanı həlak olan Nepal vətəndaşlarının ailələrinə də pul təzminatı tələb edir.

Rusiya Nepalda öldüyü təsdiqlənən 14 nəfərdən 12-nin cəsədinin olduğunu bildirib. Nepallıların əksəriyyəti ölən qohumlarının cəsədlərinin dini ayinlərə uyğun yandırılmasını istəyir.

“Rusların tərəfində vuruşan 5 vətəndaşımızın Ukrayna tərəfində əsir götürüldüyü barədə məlumatımız var. Biz Rusiya tərəfindən onların azad edilməsi üçün tədbirlər görməsini xahiş edirik”, - Saud bildirib.

Rusiya rəsmiləri Ukraynada hərbi əməliyyatlarda iştirak etmək üçün əcnəbi vətəndaşların hazırlanması ilə bağlı heç bir açıqlama verməyib, lakin KİV yazır ki, Nepalla yanaşı, Rusiya ordusu Kubadan da bir neçə nəfəri cəlb edib.

Rusiya qanunvericiliyi əcnəbi vətəndaşların Müdafiə Nazirliyi ilə müqavilə imzaladıqdan sonra Rusiya ordusuna cəlb edilməsinə icazə verir.

Sentyabr ayında Kuba səlahiyyətliləri Kuba vətəndaşlarını Ukraynaya qarşı döyüşmək üçün Rusiyaya cəlb etmək şəbəkəsindən 17 nəfəri həbs edib.

Bu ayın əvvəlində Rusiya prezidenti Vladimir Putin ölkənin silahlı qüvvələrinə qoşulan əcnəbilərin Rusiya vətəndaşlığını sürətləndirən fərman imzalayıb, belə ki, Moskva miqrantların cəlb edilməsi də daxil olmaqla müxtəlif üsullarla qoşunlarını artırmağa çalışır.

Ukraynanın bəzi nepallıları əsgər kimi döyüşmək üçün cəlb etdiyi də güman edilir, lakin Saud bu barədə əlavə məlumatı olmadığını deyib.

Nepal hökuməti vətəndaşlarının Rusiya və ya Ukraynaya işləmək üçün getməsinə qadağa qoyub, çoxlarının Ukraynadakı münaqişədə döyüşmək üçün Rusiya ordusu tərəfindən cəlb edildiyini bildirib.