Ceyms O'Brayen ABŞ-ın Qərbi Balkanlar, Cənubi Qafqaz və Mərkəzi Asiya ilə bağlı siyasəti haqqında

Prezident Bayden administrasiyasının Avropa və Avrasiyaya cavabdeh olan yüksək vəzifəli nümayəndəsi cümə axşamı bildirib ki, Vaşinqton Qərbi Balkan ölkələrilə iqtisadi inteqrasiya, eləcə də Gürcüstan, Ermənistan və Azərbaycanla əməkdaşlıq üzrə yeni layihəyə başlamaqla bağlı planlarında Avropa İttifaqını qətiyyətli dəstəkləyir, Turan-ın Vaşinqton müxbiri məlumat verib.

Transatlantik əməkdaşlıqla məşğul olan Almaniyan Marşal Fondunda çıxış edən dövlət katibinin köməkçisi Ceyms O'Brayen bildirib ki, son onilliklərdə Avropaya can atan, lakin dəqiq strategiyası olmayan bir sıra dövlətlər ortaya çıxıb. Özünü Rusiya və ABŞ arasında görənlər də olub. Bu mənzərə Xəzər sahillərindən,  hətta Mərkəzi Asiyadan Adriatikə qədər müşahidə olunur.

"Bu, bizim təhlükəsizliyimiz, həm də həmin dövlətlərin sakinləri üçün ciddi problemdir. Bu boz məkan qaydalardan kənarda olmağı sevən siyasətçilərin çiçəklənməsinə imkan verir... Onlar hər hansı qayda olmadan hamı ilə oynaya bilər", - O' Brayen deyib.

Bu kontekstdə yaxşı xəbər budur ki, Avropa İttifaqı həmin ölkələrlə qarşılıqlı əlaqələrini aktivləşdirmək üçün onlarla danışıqlara başlayacaq. ABŞ "bunu və həmin ölkələrin vahid bazar və Avropa İttifaqı daxilində gələcəyini tapması üçün lazım olan islahatları qətiyyətlə dəstəkləyir",- O' Brayen deyib.

Onun sözlərinə görə, Mərkəzi Asiya ölkələri Rusiyadan yan keçməklə, Xəzər, Azərbaycan, Gürcüstan, ola bilsin ki, Ermənistan və Türkiyə vasitəsilə ticarət yolları və infrastruktur axtarır. Böyük həcmdə ticarət, o cümlədən mineral resursların dünya ticarəti, taxıl və digər bütün malların ticarətinin mühüm hissəsi bu marşrutlarla keçir. Onun sözlərinə görə, gələn həftə Brüsseldə Avropa Yenidənqurma və İnkişaf Bankı bu ticarət layihələrinin maliyyələşdirilməsi üzrə konfrans təşkil edəcək.

Rusiyanın Ukraynaya qarşı təcavüzünə toxunan O' Brayen deyib ki, dünya Ukraynanı dəstəkləsə daha təhlükəsiz olacaq. Vaşinqton hesab edir ki, 2024-cü ilin sonuna qədər Ukrayna güclənəcək və öz gələcəyini müəyyənləşdirə biləcək, buna görə də ABŞ Ukraynaya qalib gəlməyə kömək edir.

O' Brayen xəbərdarlıq edib ki,  Qərbin sanksiyaları və Ukraynaya qarşı müharibə nəticəsində yaxın iki ildə Rusiya iqtisadiyyatı təxminən 6 faiz azalacaq.

O' Brayen Gürcüstan haqda da danışıb. Vaşinqton Gürcüstanda keçiriləcək parlament seçkilərində beynəlxalq müşahidəçi missiyasını "qətiyyətlə dəstəkləyir". "Biz bu missiya və Gürcüstanın enerjili vətəndaş cəmiyyətiiə işləmək  niyyətindəyik  ki, seçkilər yaxşı keçsin. Biz bilirik ki, Gürcüstan vətəndaşlarının 85 faizdən çoxu deyir ki,  islahatlar və Avropa İttifaqına üzv olmaq istəyir. Bundan ötrü mübarizə aparmalıyıq".  "Son aylarda Gürcüstan hökuməti islahatlar aparmaq üçün səy göstərib və biz bunu qiymətləndiririk. Biz sanksiyaları (Rusiyaya qarşı) pozmamaq üçün onların etdiklərini qiymətləndiririk".