Rusiya raketləri Ukraynanın yaşayış binalarını vurub və mülki rayonlara son zərbələr nəticəsində 17 nəfər yaralanıb

AP:  Rusiya gecə saatlarında Ukraynanın şimal-şərqindəki Xarkov şəhərinə iki raket zərbəsi endirib, Moskvanın təxminən iki illik müharibədə mülki ərazilərə son hücumları nəticəsində yaşayış binaları və tibb mərkəzi vurulub, 17 nəfər yaralanıb, bu barədə çərçənbə günü rəsmi şəxslər məlumat verib.

Xarkov vilayətinin qubernatoru Oleq Sinequbov Telegram-da bildirib ki, S-300 raketləri çərşənbə axşamı hava qaraldıqdan sonra gəlib.

“Yer-hava” tipli raketlər Rusiya tərəfindən yer hədəflərini vurmaq üçün uyğunlaşdırılıb, onların istehsalı ballistik və ya qanadlı raketlərdən daha ucuz başa gəlir.

Lakin analitiklər onların qeyri-dəqiq və daha qısa uçuş diapazona malik olduğunu deyirlər.

Hər iki tərəf silah ehtiyatlarını artırmağa çalışır, çünki soyuq hava səbəbindən 1500 kilometrlik (930 mil) cəbhə xətti boyunca döyüşlər xeyli çətinləşir, müharibənin gedişində əsas diqqət isə uzaqmənzilli raketlərin, pilotsuz təyyarələrin və artilleriyanın zərbələrinə yönəlir.

Son həftələrdə Rusiyanın Ukrayna ərazisində intensiv hava hücumları dekabr ayında mülki itkilərin sayını kəskin şəkildə artırıb: BMT-nin məlumatına görə, 100-dən çox insan həlak olub, 500-ə yaxın adam yaralanıb.

Ukrayna prezidenti Vladimir Zelenski Kiyevin Qərb müttəfiqlərinə silah tədarükünü davam etdirmək üçün diplomatik təzyiq edir.

O, bu yaxınlarda üç Baltikyanı ölkəyə səfər edib və çərşənbə axşamı öz mövqeyini ifadə etmək üçün İsveçrənin Davos şəhərində Dünya İqtisadi Forumunda olub.

Ukraynanın ikinci ən böyük şəhəri olan Xarkova gecə hücumu nəticəsində 20 yaşayış binasına və tibb mərkəzinə ziyan dəyib, deyə rəsmilər bildirib.

Rəsmi şəxslərin məlumatına görə, eyniadlı regionun dərinlikləri, cəbhə xəttinə yaxın əraziləri artilleriya atəşinə məruz qalıb.

Ukrayna Hərbi Hava Qüvvələri gecə ərzində Rusiya tərəfindən atılan 20 “Şahed” tipli pilotsuz uçuş aparatından 19-nun vurulduğunu bildirib, amma regional rəsmilər digər pilotsuz uçuş aparatlarının hava hücumundan müdafiə sistemlərindən yayına bildiyini deyib.

Odessa vilayətinin qubernatoru Oleq Kiper bildirib ki, Odessa şəhərinin cənubunda pilotsuz uçuş aparatlarının hücumu nəticəsində 3 nəfər yaralanıb, 130-a yaxın insan yaşayış binasından təxliyə edilib.

Xerson vilayətinin rəhbəri Aleksandr Prokudinin sözlərinə görə, cənub şəhəri olan Xersonda artilleriya atəşi nəticəsində gecə ərzində 3 nəfər yaralanıb və yaşayış məntəqələrinə ziyan dəyib.

Ukrayna rəsmiləri bildiriblər ki, Xarkova raket hücumları Rusiya ilə həmsərhəd Belqorod vilayətindən həyata keçirilib.

Son zamanlar bu əraziyə Ukrayna tərəfdən transsərhəd hücumları artıb.

Rusiya Müdafiə Nazirliyi çərşənbə günü bildirib ki, gecə ərzində Belqorod vilayəti üzərində Ukraynaya məxsus iki qanadlı pilotsuz uçuş aparatı və dörd raket, daha biri isə çərşənbə günü yerli vaxtla günorta radələrində vurulub.

Dağıntı və tələfatla bağlı hər hansı təfərrüat açıqlanmayıb.