Türk hərbi qüvvələri döyüşə hazır vəziyyətə gətirilib

Türkiyə Böyük Məclisi bu günlərdə Türkiyə dövlətinin xarici dövlətlərin ərazisində döyüş əməliyyatı apara bilməsi haqda qanun qəbul edib.

Türkiyə saytları bu qanun qəbul edildikdən dərhal sonra Türkiyə zirehli texnika qüvvələrinin Suriya ilə sərhədə gətirildiyini nəzərə çatdırır. Mənbələr qeyd edirlər ki, quru qoşunları hissələri, xüsusi təyinatlı hissələr, Türkiyə hərbi hava qüvvələri döyüş vəziyyətinə gətirilib. 

Hadisələrin Suriya daxilində inkişafın gedişindən asılı olaraq hərbi hissələrin Suriya ərazisinə daxil olması nəzərdə tutulur.

Türkiyə Baş Qərargah komandanı Nejdet Özel isə Suriyanın Hələb şəhəri yaxınlığında Türkiyə anklavı olan “Süleyman Şah” türbəsini müdafiə edən hərbiçilərə məktub göndərib. Baş komandan məktubunda təhlükə yarandığı ilk anda Türk hərbi qüvvələrinin düşmən üzərinə hücuma keçəcəyini nəzərə çatdırıb.

Türkiyə prezidenti Erdoğan isə terrorçular “Süleyman Şah türbəsi”nə hücum edəcəyi lahda Türkiyənin “verəcəyi cavabın məlum olduğu” kimi ifadə işlədərək, hərbi əməliyyata əl atmağın qaçılmaz olacağını söyləyib.

Oktyabrın 3-də isə özünü “islam dövləti” adlandıran terrorçular Türkiyə ilə sərhəddə yerləşən əsasən kürdlərin yaşadığı Kobani şəhərinə üç istiqamətdən hücuma başlayıb. İnternet resurslarının xəbərlərinə görə, qərb istiqamətindən terrorçular artıq Kobaniyə daxil olublar. Kürd döyüşçü dəstələri terrorçuların qarşısını kəsə bilmir. Döyüşçülər geri çəkilərək, Kobanidə “küçə döyüşləri”nə hazırlaşdıqlarını bildirirlər. -05D-