AÇG üzrə yeni müqavilədə SOCAR-ın payı 25 faiz olacaq

Bakı/14.09.17/Turan: Xəzərin Azərbaycan sektorunda "Azəri-Çıraq-Günəşli" (AÇG) yataqlar blokunun işlənməsi üzrə yeni müqavilədə 2050-ci ilədək SOCAR-ın payı

25% olacaq. Bu barədə prezident İlham Əliyev bu gün müqavilənin imzalanması mərasimində bildirib.

O, bu hadisəni AÇG yatağının işlənməsində "yeni era"nın başlanması adlandırıb.

Dövlət başçısının sözlərinə görə, yeni müqavilə Azərbaycan üçün 1994-cü ildə imzalanmış əvvəlki sazişdən daha sərfəli şərtlərlə imzalanacaq.

"Yeni müqavilədə SOCAR-ın payı 25% (mövcud müqavilə üzrə 11,65%-dir) olacaq. Bununla yanaşı, müqavilə imzalandıqdan sonra xarici investorlar tərəfindən Azərbaycana müxtəlif bonuslar şəklində $3,6 mlrd. ödəniləcək. Mənfəət neftinin payı 75% olacaq", - İ.Əliyev qeyd edib.

"Eyni zamanda onu da qeyd etməliyəm ki, 23 il ərzində sazişin icrası da çox uğurlu idi və bu illər ərzində 436 milyon ton neft "Azəri", "Çıraq", "Günəşli"dən hasil edilib. Yaxşı xatırlayıram ki, 1994-cü ildə müqavilə imzalananda təxmin edilən neft ehtiyatları 511 milyon ton müəyyən edilmişdir. Ancaq bugünkü məlumat - əminəm ki, bu, son məlumat deyil, ehtiyatlar daha da artacaq - onu göstərir ki, hələ də "Azəri", "Çıraq", "Günəşli"də hasil edilməmiş təxminən 500 milyon ton neft ehtiyatı vardır. Yenə də qeyd etmək istəyirəm ki, bu, ilkin hesablamalardır. Əminəm ki, sazişin icrası müddətində bu rəqəm daha da artacaq", - daha sonra prezident bildirib. -06D--