2023-cü ildə Azərbaycanda qeyri-neft məhsullarının 18,6 faizi sənaye parklarında və məhəllələrdə istehsal olunub.

Azərbaycanın İqtisadi Zonaların İnkişafı Agentliyinin (İZİA) idarə etdiyi sənaye parklarının və məhəllələrin sakinləri öz layihələrinə indiyədək 6,6 milyard manatdan çox sərmayə qoyublar. Bu barədə İZİA-nın İdarə Heyətinin sədri Seymur Adıgözəlov bu gün keçirilən mətbuat konfransında məlumat verib.

Bu investisiyaların əsas nailiyyəti 10 mindən çox iş yerinin yaradılması olub. Yəni layihələr faktiki işləyir, onların hesabına 12,1 milyard manatlıq məhsul istehsal olunub, onun hətta üçdə biri - 3,9 milyard manatı ixraca göndərilib. Təkcə 2023-cü ildə istehsal həcmi 3,3 milyard manat, ixrac isə 989 milyon manat təşkil edib.

S.Adıgözəlovun sözlərinə görə, beləliklə, son bir ildə Azərbaycanda qeyri-neft məhsullarının istehsalının 18,6 faizi sənaye parkları və məhəllələrdə formalaşıb və onların qeyri-neft ixracında xüsusi çəkisi 23,6 faizə çatıb.

Adıgözəlov əlavə edib ki, sənaye zonaları və məhəllələrində istehsal olunan məhsullar 65 ölkəyə, o cümlədən Hindistan, Çin, ABŞ, İsrail, Kanada və s ixrac edilib.

Yeri gəlmişkən, 2023-cü ildə sənaye parklarına və məhəllələrə qoyulan investisiyaların həcmi 471 milyon manat təşkil edib.

Qeyd edək ki, bu gün sənaye parkları və sənaye məhəllələrində 142 sahibkarlıq subyekti rezident statusuna malikdir. Onların hamısına 10 il müddətinə (qeydiyyata alındığı tarixdən) əmlak, torpaq və mənfəət vergisi güzəştləri, habelə istehsal məqsədləri üçün maşın, texnoloji avadanlıq və qurğuların idxalı zamanı ƏDV və gömrük rüsumlarından güzəştlər verilir.  Bunun sayəsində rezidentlər 460 milyon manatdan çox qənaət edə biliblər.