Müxalif siyasətçilər baş nazir Əli Əsədovun çıxışını tənqid ediblər

Müxalif siyasətçilər Əli Əsədovun yenidən Azərbaycanın baş naziri vəzifəsinə təyin olunmasından sonra parlamentdəki çıxışını tənqid ediblər. 

"Əli Əsədovun çıxışı İlham Əliyevin andiçmə nitqinin təkrarı oldu. O, hərbi təhlükəsizliyin təmin edilməsi, sərhədlərin qorunması, sosial-iqtisadi inkişaf, ən yeni texnologiyaların tətbiqi haqqında tezisləri ümumiləşdirilmiş formada təkrar edib", deyə Azərbaycanın keçmiş baş naziri Pənah Hüseyn bildirib. 

O qeyd edib ki, Azərbaycanda hökumətə prezident rəhbərlik edir, baş nazir isə "icraçı şəxsdir".

"Prinsipcə, Azərbaycanda ilkin kapitalın yığılması mərhələsi başa çatıb. Buna görə məmur-oliqarx sistemi aradan qaldırılmalıdır. Rəqabətli iqtisadiyyata keçmək üçün siyasi hakimiyyətin və iqtisadi gücün bir əldə cəmləşdirilməsinə son qoyulmalıdır", deyə Hüseyn bildirib.

Azərbaycanda siyasətdə olduğu kimi, iqtisadiyyatda da avtoritarizm hökm sürür, bu da iqtisadiyyatın inkişafı üçün problemlər yaradır, deyə o, qeyd edib. Eyni zamanda, o, hökumətin karbohidrogen tədarükçülüyündən texnologiyaların istehsalına keçid kursunu doğru hesab edir. Lakin bunun üçün Azərbaycan dünya iqtisadi proseslərinə xammal ölkəsi kimi inteqrasiya olunmamalıdır. Bunun üçün siyasi idarəçilik tamamilə dəyişdirilməlidir.

"Yeni mərhələdə iqtisadiyyata parlamentin güclü nəzarəti və ictimai etimad təmin edilməsə, hökumətin bəyannamələri niyyət olaraq qalacaq", deyə o, sözünə davam edib. Bunun üçün Konstitusiyaya dəyişikliklər edilməli və mülkiyyət zəmanəti təmin edilməlidir.

Öz növbəsində, Xalq Cəbhəsi Partiyasının lideri Əli Kərimli Azərbaycanda superprezident respublikasının yaradıldığını qeyd edib.

"Konstitusiyanın dövlət başçasına hədsiz səlahiyyətlər verməsi ilə yanaşı, ölkədə həm də şəxsi hakimiyyət rejimi formalaşıb. Bu vəziyyətdə iqtisadi siyasət prioritetlərini baş nazir deyil, prezident müəyyən edir.

Əli Əsədov bugünki çıxışında iqtisadi inkişaf prioritetlərinin dəyişmədiyini etiraf edib. 

Kərimlinin fikrincə, Əliyev andiçmə nitqində Azərbaycanın sürətləndirilmiş özünütəcrid siyasətinin anonsunu verib. "O, Aİ, ABŞ, bütünlükdə Qərb dünyası ilə qarşıdurma siyasətinin anonsunu verib. Bu, Azərbaycan iqtisadiyyatının şaxələndirilməsinin, investisiya və texnologiyalar cəlb edilməsinin məhdud olacağını iddia etməyə imkan verir.

İkinci prioritet kimi o, Azərbaycanın silahlanmasını qeyd edib. Yəni nə müharibə, nə sülh vəziyyəti davam edəcək. Ölkənin resurslarının böyük hissəsi hərbiləşməyə gedəcək, ordunun çoxmilyardlıq xərcləri isə yaxın illərdə əsas prioritet olacaq", deyə Kərimli bildirib.

Azad edilmiş ərazilərin bərpa olunmasına gəlincə, neft hasilatı və ixracı azalır. 2010-cu illə müqayisədə neft istehsalı 70% azalıb.

Gəlirlərin əsas hissəsi hərbi ehtiyaclara və ərazilərin bərpa olunmasına sərf olunsa, iqtisadi inkişaf prioritet olmayacaq, Kərimli belə hesab edir.

Buna görə, Əsədovun təhsil, yeni texnologiyaların tətbiqi, qeyri-neft sektorunun inkişafı, təmiz enerjiyə keçidin prioritet istiqamətlər olacağı haqqında bəyanatları gözəl sözdən başqa heç nə deyil.

Bu gün ölkənin ümumi ixracatının 92,5%-ni neft və neft məhsulları təşkil edir. Baxmayaraq ki, 20 illik hasilat və yüz milyardlarla dollar gəlirin olduğu müddətdə qeyri-neft sektorunun real inkişafı baş verməyib. 

"Onlalr informasiya texnologiyalarının inkişafı mərkəzini yaradıblar, əslində isə bu mərkəz sosial şəbəkələrdə müxalifətin izlənilməsi ilə məşğul olur. Hakimiyyət informasiya texnologiyalarının inkişafından danışdıqda isə fərqli düşüncənin sıxışdırılmasını nəzərdə tutur. Sosial inkişaf haqqında söhbətlər isə ümumiyyətlə real deyil. Ölkənin bu qədər sərvəti olduğu halda, minimal, orta əmək haqqı və sosial müavinətlər qonşu ölkələrdə olduğundan daha azdır", deyə Kərimli bildirib.