Aİ, Azərbaycan və Türkmənistan Transxəzər qaz kəməri layihəsi üzrə əməkdaşlığı davam etdirir

Avropa İttifaqı ikitərəfli əməkdaşlıq çərçivəsində Azərbaycanla yaxınlaşma prosesini görməkdən məmnundur, deyə dünən Aİ-nin genişlənmə və Avropa qonşuluq siyasəti üzrə komissarı Ştefan Fyule Brüsseldə Azərbaycan-Aİ Şurasının iclasında bildirib. 

“Strateji tərəfdaşlıq sahəsi olan energetikada Cənub enerji dəhlizi üzrə mühüm addımlar qəbul edilib. Azərbaycan parlamentinin Türkiyə ilə TANAP layihəsi sazişini təsdiq etməsini alqışlayırıq. Yaxın aylarda “Şahdəniz” konsorsiumu Aİ-yə qazın ixracı marşrutu barədə qərar qəbul edəcək”, – deyə Fyule bildirib. 

Onun sözlərinə görə, Azərbaycan XİN rəhbəri ilə görüşündə Transxəzər qaz kəməri layihəsini də müzakirə ediblər. “Nazir Məmmədyarovla üçtərəfli sazişi başa çatdırmaq, Cənub enerji dəhlizi üçün yol açmaq məsələsində Türkmənistanla sıx əməkdaşlıqda işləmək üzrə birgə öhdəliyimizi təsdiq etdik”, – deyə avrokomissar bildirib. 

* 2011-ci ilin sentyabrında Aİ Avropa Komissiyasına tapşırıb ki, rəsmi Bakı və Aşqabad ilə Transxəzər qaz kəməri layihəsi üzrə danışıqlara başlasın. 2011-ci il oktyabrın ortalarından 2012-ci ilin mayına kimi tərəflər arasında danışıqların 6 raundu keçirilib. Bu il Azərbaycan və Türkmənistan prezidentlərinin, eləcə də Aİ rəhbərlərindən birinin Transxəzər qaz kəməri layihəsinə dəstək üzrə siyasi bəyannamə və Azərbyacan-Türkmənistan hökumətlərarası sazişi imzalaması planlaşdırılırdı. Amma Aşqabad nə Qərblə, nə də Azərbaycanla hətta memorandum səviyyəsində hansısa sənəd imzalamaq  istəmədi. Amma Bakı ilə Brüssel arasında yaxşı münasibətlər yaranıb və 13 yanvar 2011-ci ildə energetika üzrə əməkdaşlıq barədə Memorandum imzalanıb, Energetika Nazirliyi ilə Aİ-nin energetika komissarlığı arasında işçi qrup yaradılıb. –12В—