Aİ səfiri: �Aİ aviasiya sazişi ilə bağlı Azərbaycanın təkliflərini gözləyir�

Bakı/12.07.19/Turan: Avropa İttifaqı Şurasının prezidenti Donald Tuskun Azərbaycana səfəri uğurlu keçib və tərəflər əməkdaşlığı inkişaf etdirmək niyyətini təsdiqləyiblər. Bu barədə Avropa İttifaqının Azərbaycandakı nümayəndəliyinin rəhbəri Kəstutis Yankauskas bu gün jurnalistlərə bildirib.

Səfir bir daha deyib ki, Aİ və Azərbaycan arasında yeni sazişlə bağlı danışıqlar son mərhələdədir.

"Prezident İlham Əliyev Donald Tusk ilə görüşündə qeyd edib ki, yeni saziş üzrə bir çox məsələlər öz həllini tapıb, qalan məsələlər tərəfdaşlıq ruhunda həll ediləcək", - səfir deyib.

O bildirib ki, Aİ danışıqları başa çatdırmaq və yeni sazişi imzalamaq istəyir.

K.Yankauskas xatırladıb ki, 2017-ci ildən tərəflər aviasiya sazişi üzrə danışıqları yenidən aktuallaşdırıblar.

"Aviasiya sazişi həm iqtisadiyyatın diversifikasiyası, turizm artımı, həm də Azərbaycanın da can atdığı nəqliyyat xabının yaradılması baxımından ölkə üçün faydalı olacaq. Hazırda biz aviasiya sazişi ilə bağlı Azərbaycan tərəfinin təkliflərini gözləyirik", - o bildirib.

Səfir qeyd edib ki, müqavilə imzalamayınca buraxılmış böyük imkanlar baxımından hər gün itirilmiş sayılır.-71С-