"Aqrolizinq" ASC Hesablama Palatasının hədəfində

  Hesablama Palatasının 2014-cü il may ayının 25-də keçirilən Kollegiya  iclasında “Aqrolizinq” ASC-yə dövlət büdcəsindən ayrılan və təkrar istifadə edilən vəsaitlərin proqnozlaşdırılması və istifadəsinə dair audit tədbirlərinin nəticələri üzrə hesabatlar və  rəylər  geniş müzakirə olunub.

Rəsmi məlumata görə, materialların Azərbaycan Respublikasının Baş Prokurorluğuna və Milli Məclisə təqdim edilməsi qərara alınıb. “Aqrolizinq” ASC-də dövlət əmlakından və ayrılmış büdcə vəsaitlərindən qanunsuz istifadə, büdcə öhdəliklərinin icra edilməməsi, iş həcmlərinin artırılması, borcların uçotdan yayındırılması və digər maliyyə pozuntuları aşkarlanıb.

Bundan başqa, Əmək və Əhalinin Sosial Müdafiəsi Nazirliyi yanında Dövlət Sosial Təminat Xidmətinin Bərdə rayon Əhalinin Sosial Müdafiəsi Mərkəzi və Vergilər Nazirliyinin 11 saylı Ərazi Vergilər İdarəsində yoxlamalar barədə qərar qəbul edib.

Naxçıvan Muxtar Respublikasının Dövlət Arxiv İdarəsinin və Naxçıvan MR Əlillərin Bərpa Mərkəzinin saxlanılmasına ayrılan vəsaitlərin proqnozlaşdırılması və istifadəsi ilə bağlı nəzarət tədbirlərinin proqramları da təsdiq edilib.

Xatırladaq ki, "Aqrolizinq" ASC-də ötən ilin oktyabrında da yoxlama keçirilib, filialların rəhbərlərindən biri həbs olunub. SC-nin sədri Əli Bayramov 21 mayda səhhəti ilə bağlı işdən çıxma ərizəsi yazıb. Növbəti gün isə maneəsiz Türkiyəyə uçub. Amma büdcədən bir qəpik belə almayan QHT rəhbəri Anar Məmmədli vergi ödəmədiyi üçün 5,5 il həbs cəzası alıb.

"Aqrolizinq" ASC Kənd Təsərrüfatı Nazirliyinin strukturuna daxildir.

Hesablama Palatası bir qayda olaraq yoxlamalarının nəticələrini açıqlamır. Bəzən ümumi nəticələri elan edir, konkret fakt və rəqəmlər gətirmir.

“İnformasiya əldə edilməsi haqqında” Qanunun 6.0.3 maddəsinə əsasən, büdcə vəsaitlərinin yoxlanması barədə informasiyanın yayılması dövlət strukturlarının, o cümlədən Hesablama Palatasının vəzifəsidir.. --17D—