ARDNŞ "Bulla dəniz" yatağında 10 mlrd m3 qaz ehtiyatı kəşf edib

Dövlət Neft Şirkəti "Bulla dəniz" yatağında №90 quyuda kəşfiyyat qazması zamanı tapılan qaz ehtiyatının 10 mlrd m3 olduğunu bildirir. Bu barədə dünən jurnalistlərə ARDNŞ-nin I vitse-prezidenti Xoşbəxt Yusifzadə məlumat verib. 

Onun sözlərinə görə, dərin layların (6000 metr) məhsuldarlığı yüksək olub. 

Yusifzadə izah edib ki, ARDNŞ bu ehtiyatın işlənməsi üçün yeni hasilat platforması qurmaq istəyir. “O, yanğın baş verən köhnənin yaxınlığında olacaq. Yeni platformadan istismar quyuları qazılacaq”, - deyə Xoşbəxt Yusifzadə məlumat verib. 

Xilas edilən quyu ilə bağlı Yusifzadə deyib ki, o, artıq istismar edilir və gündəlik debet 1,2-1,3 mln m3 qaz və 200 ton kondensatdır. 

Müqayisə üçün deyək ki, bu quyunun debeti “Ümid” yatağında istismara verilən quyudakından (1 mln m3) çoxdur. 

* 2012-ci ilin noyabrında ARDNŞ "Bulla dəniz" yatağında kəşfiyyat quyusu qazmağa başlayıb. 17 avqust 2013-cü ildə orda yanğın baş verib. Yanğını 23 oktyabrda söndürmək mümkün olub. Qazma nöqtəsində dənizin dərinliyi 26,5 metrdir. 

"Bulla dəniz" yatağı 1975-ci ildə kəşf edilib. O vaxtdan 11 mln ton kondensat və 62 mlrd m3 qaz hasil edilib. –12С--