ARDNŞ-nin törəməsi Rusiyanın cənubunda karbohidrogenlərin istismarı üçün gücünü sınayacaq

ARDNŞ-nin törəməsi olan “SOCAR Rus” Həştərxan vilayətində karbohidrogen yataqlarının öyrənilməsi üzrə proqram hazırlayır, deyə vilayətin sənaye, nəqliyyat və təbii ehtiyatlar naziri Sergey Krjanovski bildirib.

Müəssisə 2013-cü ilin dekabrında Şimali Beşkul sahəsində karbohidrogen yataqlarının axtarışı və qiymətləndirilməsi üçün lisenziya alıb. Yataq Nərimanov rayonundadır, deyə “İnterfaks-Yuq” bildirir.

Axtarış nəticə versə, şirkət yatağı işləyəcək. “SOCAR Rus”un lisenziyalı sahəsindən cənubda “Beşkul” neft yatağı var. Onu Rusiya şirkəti istismar edir, şimal-şərqdə “Həştərxan” qaz yatağı var.

“SOCAR Rus” saziş çərçivəsində 1 dekabr 2014-cü ilədək təsdiq edilməli proqramı icra etməlidir. İlin sonuna kimi şirkətin planlarını öyrənəcəyik”, - deyə Krjanovski bildirib.

Nazirliyin məlumatına görə, Həştərxan vilayətində 4,7 trln m3 qaz, 1 mlrd 37 mln ton neft və kondensat var. 

ARDNŞ artıq Rusiyanın cənubunda neft və qaz axtarışı üzrə lisenziya almaq üçün müraciət edib. 2013-cü ilin yazında o, RF-də Kalmıkiya Respublikasında Xəzərin təkindən istifadə hüququ üzrə hərracda iştirak edib. Amma başqa müraciətlər olmadığı üçün hərrac baş tutmayıb. Yəqin ki, şirkət təkrar hərracda iştirak edəcək.

Kalmıkiyada işləyən Shell, “Tatneft” və Lukoyl 5 min metrdən dərində çoxlu karbohidrogen ola biləcəyini iddia edir. Burda neft hasil edilsə, onu az xərclə Mahçqala və ya Bakı vasitəsilə nəql etmək olar. “SOCAR Rus” iddia etdiyi ərazi 100,4 kv km-dir, orda 4,5 mln ton neft olduğu proqozlaşdırılır. 

Mütəxəssislər ARDNŞ-nin xaricdə neft və qaz hasilatına qoşulmaq istəməsini müsbət qiymətləndirir. O, riski azaltmaq üçün Azərbaycanla qonşu ölkəni və neft-qaz ehtiyatı olan quru ərazini seçib.

* “SOCAR RUS” 6 may 2013-cü ildə Moskvada qeydiyyata alınıb. Fəaliyyət növü neft və qaz hasilatı və bu sahədə xidmətdir. Baş direktoru Fərid Cəfərovdur. Səhmlərinin  99%-i ARDNŞ-yə, 1%-i RF vətəndaşı olan fiziki şəxsə məxsusdur.—0--