Avqust ayinda təkrar mənzil bazarinda qiymətlər sabit qalib

Avqust ayında paytaxtın və eləcədə respublikanın digər iri şəhərlərinin Təkrar Mənzil Bazarında (TMB) nisbi aktivlik müşahidə edilsədə, ay ərzində qiymətlər dəyişməz olaraq qalmışdır. Əmlak Bazarı İştirakçıları ictimai birliyinin hesablamalarına görə hal-hazırda TMB-da orta qiymət indeksi təxminən 1 kv/m üçün-1312 ABŞ dolları, mənzilin orta qiyməti isə 118 212 ABŞ dolları təşkil edir. Ötən ilin müvafiq dövrü ilə müqayisədə qiymət artımı 32.1% olub. 2013-cü ilin avqust ayı ərzində daşınmaz əmlakın təkrar mənzil bazarı seqmentində aparılan araşdırmalar zamanı bağlanan əqdlərin dinamikasında da ötən aya nisbətən azalma müşahidə edilmişdir.

Yasamal, Nəsimi, Nərimanоv və Xətai rayоnlarının təklif pоrtfеlindəki payı ötən aylarda olduğu kimi mütləq çохluq təşkil еdib və onların ümumi payı 78%- ə bərabər olub. Avqust ayında otaqlar üzrə mənzillərin vəziyyətinə gəldikdə, 4 və 5 otaqlı mənzillərin sayında azalma baş verib. Təklif üzrə ən çox azalma 4 otaqlılar üzrə qeydə alınıb. 1, 2 və 3 otaqlı mənzillərin təklif üzrə payında isə artım müşahidə olunub. Təklif üzrə ən çox artım 2 otaqlı mənzillərdə qeydə alınıb və 2,6% təşkil edib.

Ekspertlər avqust ayında qiymətlərin sabit qalmasını əsasən mövsümi amillərlə izah edirlər. Yay aylarında insanların daha çox istirahət və səyahətlərə vaxt ayırmaları, bazardakı aktivliyə öz təsirini göstərir. Ümumiyyətlə mütəxəssislər son aylarda bazardakı qiymətlərin bahalaşmasını və aktivləşməni əsasən ipoteka kreditləşməsi, eləcədə evləri plana düşmüş insanlara yeni mənzillər almaq üçün kompensasiyaların verilməsi ilə əlaqələndirirlər. Yaxın günlərdə TMB-da aktivliyin davam edəcəyi, qiymətlərin isə əsasən sabit və bahalaşmağa meyilli olacağı  proqnozlaşdırılır.