AVSMMİS üzrə müqavilələrin sayı 15,2% azalıb

2017-ci ilin fevral ayı ərzində avtonəqliyyat vasitəsi sahiblərinin mülki məsuliyyətinin icbari sığortası (AVSMMİS) üzrə 64 min 123 elektron sığorta müqaviləsi qeydiyyata alınıb, deyə İcbari Sığorta Bürosu bildirir.

Bunların 8191-i xarici ölkədə qeydiyyata alınmış və Azərbaycana tranzit məqsədilə daxil olan avtonəqliyyat vasitələridir.

Fevral ayı ərzində AVSMMİS üzrə sığorta haqları 5088747 manat təşkil edib.

2017-ci ilin yanvarı ilə müqayisədə müqavilə sayı 5 min 36 ədəd və ya 8,5%, sığorta haqları 488,747 min manat və ya 10% artıb.

Ötən ilin fevral ayı ilə müqayisədə sığorta müqavilələrinin sayında 15,2% azalma, sığorta haqlarının məbləğində isə 18,9% azalma müşahidə edilib.

Qeyd edək ki, 1 noyabr 2016-cı il tarixindən avtomobillər üçün  icbari sığorta müqavilələrinin elektron sənəd formasında bağlanılmasına başlanılıb.

Hazırda 13 sığorta şirkəti (“Atəşgah” Sığorta Şirkəti ASC, “Standard İnsurance” Sığorta Şirkəti ASC, “AtaSığorta” ASC, “Xalq Sığorta” ASC, “PAŞA Sığorta” ASC, “AXA MBASK” Sığorta Şirkəti ASC, “AzSığorta” ASC, Azərbaycan Respublikası Dövlət Sığorta Kommersiya Şirkəti, “Meqa Sığorta” ASC, “İPƏK YOLU SIĞORTA” ASC, “Azərbaycan Sənaye Sığorta” ASC, “Qala Sığorta” ASC, “Günay Sığorta” ASC) AVSMMİS üzrə xidmət göstərir. 71D