AXA MBASK-dan sığorta agentləri üçün mobil marketinq imkanı

Azərbaycanın ən böyük müstəqil agent şəbəkəsinə malik olan AXA MBASK sığorta şirkəti agentlərə investisiya yatırmağa davam edir.

Şirkətdə Turan-a deyiblər ki, hər bir müştəriylə fərdi yanaşmanın müstəsna əhəmiyyət kəsb etdiyini nəzərə alan AXA MBASK şirkəti yeni AXA Messenger adlı xidməti öz agentlərinə təqdim edir.

AXA Messenger AXA MBASK mütəxəssisləri tərəfindən, şirkətin ümumi sığortaçılıq proqramı olan Phoenix sistemi əsasında hazırlanmış bir rəqəmsal kampaniya idarəsi (Digital Campaign Managment) moduludur. Bu modul vasitəsilə agent öz adından (şirkətdən müstəqil olaraq),  öz müştərilərinə həm fərdi, həm də toplu şəkildə Email və ya SMS-bildirişləri vasitəsi ilə marketinq xəbərləri yaya bilər.

Email ve SMS-bildirişləri müştəriyə mühüm hadisələr haqqında vaxtında xəbər çatdırmaq imkanı yaradacaq. Agentlər bu yolla sığorta ödənişin vaxtı, sığorta müqaviləsinin başa çatması və yaxud uzadılması gününün yaxınlaşdığı barədə xatırlatmalar və bunun kimi başqa xəbərləri öz vaxtlarına uyğun çatdıra bilərlər.

Bununla yanaşı, agent SMS-bildirişlər vasitəsilə özü tərəfindən xüsusi təklif, aksiya, yeni xidmətlər bildirə, yaxud sığorta şirkətinin fəaliyyətinə dair müştəri üçün əhəmiyyətli olan başqa məlumatları ötürə bilər. SMS bildirişləri müştərini bayram və ya şəxsi əlamətdar günləri münasibətilə təbrik etmək üçün də göndərilə bilər.

Bu hadisəni şərh edən AXA MBASK İdarə Heyəti sədrinin birinci müavini Səlçuq Adıgözəl qeyd edib ki, “AXA Messenger agentlərimizə öz bizneslərini daha asan və çevik idarə etməkdə yardımçı olar və bu, şübhəsiz, onların məhsuldarlığına, səmərəli fəaliyyətinə töhfə olacaq”.

  “Agent Şəbəkəsi İdarəsi bütün resursları agentlərin ehtiyaclarına uyğun formalaşdırır. Məqsədimiz agentlərimizin daxili əməliyyatlarına sərf etdikləri vaxtı azaltmaq, daha çox satış edərək, daha çox gəlir imkanı əldə etmələrdir. Biz daim xidmət səviyyəsini yüksəltməyə çalışaraq ən müasir informasiya texnologiyaları tətbiq edirik. Bu layihələr agentlərimizin müştəri ilə təmaslarını və xidmətlərin keyfiyyətini artıraraq, satış potensialını qaldırır. Təcrübədən də gördüyümüz kimi, çox səmərəli olur, - deyə Səlçuq Adıgözəl əlavə edib.

 Sığorta xidmətlərini daim təkmilləşdirməyi qarşıya məqsəd qoyan AXA MBASK geniş agent şəbəkəsinin inkişafına fəal şəkildə təkan verir. Qısa müddət ərzində şirkətin həm paytaxtda, həm də bölgələrdə yaratdığı çoxşaxəli agent şəbəkəsi bu gün 80-dən artıq agentliklə ölkədə ən böyüyüdür. Bu da sığorta xidmətlərinin tam əhatə olunmasını və potensial istehlakçılar üçün əlverişliliyini təmin edir. --17D—