AZAL və «Tour A Vent» əməkdaşlıq haqqında razılığa gəliblər

 “Azərbaycan hava yolları” aviaşirkəti (AZAL) “ Tour A Vent” turizm şirkəti ilə uzunmüddətli əməkdaşlıq haqqında razılığa gəlib.

Müqaviləyə görə, turizm şirkətinə AZAL aviaşirkəti tərəfindən yerinə yetirilən Kazan-Bakı-Kazan müntəzəm reysində yer bloku ayrılacaq. Bu barədə AZAL-ın mətbuat xidməti bildirib.

Tərəflər Ulyanovsk hava limanından Bakıya çarter reyslərin yerinə yetirilməsini razılaşdırıblar. Reyslər “Embraer” və ya “Airbus” hava gəmiləri ilə yerinə yetiriləcək.

“Mən çox şadam ki, bizim Rusiya regionlarındakı danışıqlarımız konkret nəticə verməyə başlayıb. AZAL aviaşirkəti Azərbaycana turistlərin cəlb edilməsi üçün xarici turizm şirkətlərinə yaxşı şərtlər təqdim etməyə hazırdır", - AZAL QSC-nin vitse-prezidenti Eldar Hacıyev bildirib.

“Şirkətimizin əsas məqsədi Azərbaycan turizmini təbliğ və təşviq etməkdir.  AZAL Rusiyanın müxtəlif regionlarına bir çox müntəzəm uçuşlar yerinə yetirir və mən əminəm ki, bizim sıx əməkdaşlığımız uzunmüddətli xarakter daşıyacaq”, - Tour A Vent şirkətinin Volqayanı filialının baş direktoru Yuliya Uba bildirib.

Tour A Vent Azərbaycan Mədəniyyət və Turizm Nazirliyinin Rusiya Federasiyasında rəsmi turizm nümayəndəliyidir.08D