Azərbaycan banklarının yekun mənfəəti 36,4% artıb

Azərbaycanda fəaliyyət göstərən bankların ümumi gəlirləri 2012-ci ilin yanvar-noyabrında 1476,42 mln manat olub. Bu, 2011-ci ilin eyni dövründəkindən 194,26 mln manat və ya 15,1% çoxdur. Qeyri-faiz gəlirləri 16,7% artaraq 328,11 mln manat olub.

Hesabat dövründə bankların xərcləri 124,16 mln manat və ya 12,3% artaraq 1129,47 mln manat təşkil edib. Aktivlər üzrə ehtiyat ayırmalar 2011-ci ilin eyni dövrü ilə müqayisədə 23,95 mln manat və ya 15,4% artaraq 179,72 mln manat (aktivlər il ərzində 23,1% artıb) olub. 

AMB-dən Turan-a verilən məlumata görə, bank gəlirlərinin strukturunda əsas hissə faiz gəlirlərinin – 77,8%, xərclərdə faiz ödəmələrinin (52,6%) payına düşüb. 

Vergi ödənilənə qədər bankların illik mənfəəti 168,18 mln manat olub. Bu, ötən ilin yanvar-noyabrındakından 38,8% çoxdur. Bank sisteminin yekun mənfəəti il ərzində 36,4% artaraq 151,13 mln manata çatıb. 

Ötən ilin 11 ayında 35 bank rentabelli işləyib. Onların ümumi xalis mənfəəti 244,44 mln manat olub. 8 ziyanla işləyən bankın itkisi 93,31 mln manat təşkil edib. 2011-ci ilin eyni dövrü ilə müqayisədə mənfəətli bankların sayı 3 vahid artıb. Ziyanla işləyən bankların sayı 4 vahid azalıb, onların ümumi itkisi isə 2,7 dəfə artıb. --15В--