Azərbaycan İrana daha bir NBM açmağı təklif edib

İki ölkə arasında ticari əlaqələri genişləndirmək üçün “Aslandüz-Horadiz” sərhəd-keçid məntəqəsinin fəaliyyətinin bərpa etmək lazımdır, deyə Dövlət Gömrük Komitəsinin sədri, gömrük xidməti general-leytenantı Aydın Əliyev 19 apreldə İran İslam Respublikasının ölkəmizdəki fövqəladə və səlahiyyətli səfiri Möhsün Pak Ayinlə söhbətində bildirib. 

 DGK-nın məlumatına görə, Möhsün Pak Ayin İran hökumətinin Azərbaycanla münasibətləri heç bir məhdudiyyət olmadan genişləndirməkdə maraqlı olduğunu və bir diplomat kimi iki ölkə arasında əlaqələrin daha da genişlənməsinə və dərinləşməsinə çalışdığını söyləyib. O, Azərbaycan və İran gömrük orqanlarının qarşılıqlı fəaliyyətinin gücləndirilməsi məqsədilə iki ölkənin sərhəd-gömrük buraxılış məntəqələri əməkdaşlarının işgüzar görüşlərinin keçirilməsinin, bu məntəqələrdə vətəndaşların rahat gediş-gəlişinə mane ola biləcək problemlərin yerindəcə həll edilməsinin, eləcə də ölkələrimizin gömrük sahəsi üzrə mövcud qanunvericiliklərinin daha dərindən mənimsənilməsi üçün birgə treninqlərin keçirilməsinin zəruriliyini nəzərə çatdırıb. İran səfiri  ölkəsinin Gömrük Adminstrasiyasının rəhbəri Abbas Memarnejadın rəsmi dəvətini Dövlət Gömrük Komitəsinin sədri Aydın Əliyevə çatdırıb, bu səfərin yaxın zamanlarda gerçəkləşəcəyinə ümidvar olduğunu bildirib. 

Azərbaycanla İİR arasında dövlət sərhədi 432 km-dir. Hazırda Naxçıvanda 3, digər ərazilərdə daha 3 gömrük məntəqəsi var.  08D