Azərbaycan prezidenti: Bakıda daha bir iri elektrik stansiyası tikilə bilər

Azərbaycan prezidenti İlham Əliyev Bakıda daha bir iri elektrik stansiyası tikilməsini zəruri sayır. 

“Yaxın 10 ildə Azərbaycanın necə inkişaf edəcəyi məlumdur, ona görə yeni elektrik stansiyası tikilməsi zəruridir”, - deyə Azərbaycan prezidenti İlham Əliyev "2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramı"nın icrasının yekunlarına həsr olunmuş konfransda bildirib. 

Onun sözlərinə görə, Bakının elektrik enerjisi təchizatında problem yoxdur. 

“Son bir neçə ildə bir neçə elektrik stansiyası tikilib. Energetika potensialımızı xeyli gücləndirmişik. Son on ildə tikilən stansiyalar ehtiyacımızın 40%-i təmin edir. Əgər o stansiyalar tikilməsəydi, bu gün biz ölkəmizin uğurlu inkişafına nail ola bilməzdik”, - deyə o bildirib. 

O, qeyd edib ki, son on ildə elektrik enerjisinə tələbat artıb. Çünki son on il ərzində həm iqtisadiyyat, sənaye artıb, insanların rifah halı yaxşılaşıb. 

Əliyev deyib ki, son illərdə insanların yaşayış səviyyəsinin yaxşılaşması nəticəsində vətəndaşların əksəriyyəti kondisionerlər əldə ediblər və beləliklə, yayda da enerjiyə olan tələbat artıb. 

“ Ancaq biz gələcəkdə yeni stansiyaların tikintisinə başlayacağıq. Eyni zamanda, Bakı şəhərində və bölgələrdə yarımstansiyaların tikintisi də nəzərdə tutulmalıdır. Çünki bizim uğurlu inkişafımız bunu tələb edir. Tələbat artır və mövcud potensial tələbatdan çox, ondan böyük olmalıdır. Biz öz inkişaf dinamikamızı bilirik. Bilirik ki, on il bundan sonra Azərbaycan necə inkişaf edəcəkdir. Ona görə, yeni stansiyaların tikintisinə böyük ehtiyac vardır", deyə prezident qeyd edib.

O qeyd edib ki, hazırda Bakıda yeni böyük elektrik stansiyası tikilir - "Şimal-2": "Ola bilər ki, bir dənə də böyük stansiyanın tikintisinə ehtiyac olacaqdır. Ötürücü xətlər də yenilənir. Ötürücü xətlərin yerin altına salınması prosesi də gedir. Biz buna da nail oluruq. Bir sözlə, elektrik təchizatı ilə hazırda şəhərdə heç bir problem yoxdur. Ancaq gələcəyə baxmaq lazımdır və daim bu sahə diqqət mərkəzində olmalıdır”, - deyə Əliyev qeyd edib. 

* “Azərenerji”nin məlumatına görə, hazırda 21 elektrik satnsiyasının balans gücü 6300 MVt-dir. 

Dövlətstatkoma görə, bu ilin iyulunda “Azərenerji” sistemində 1,8 mlrd kVt/saat elektrik enerjisi istehsal edilib. Bu ilin noyabrında da bu qədər elektrik enerjisi istehsal edilib.