Azərbaycanda mehmanxanaların yüklənməsi az olsa da, gəlirləri artır

2013-cü ildə mehmanxana biznesinə investisiyalar artıb. Bu, onların maliyyə göstəricilərinə də təsir edib.

Dövlətstatkoma görə, il ərzində mehmanxana müəssisəslərinin sayı 514-dən 530-a artıb. 16 yeni mehmanxananın bir dəfəlik tutumu 1177 yerdir. 1 yanvar 2014-cü il üçün mehmanxanalarda 16 559 nəmrə var və onlar 34 min nəfər qəbul edə bilir. Bunun 31%-i Bakının payına düşür.

DSK-nın məlumatına əsasən, il ərzində mehmanxanalar 666,3 min nəfər yerləşdirib. Bu, 2012-ci ildəkindən 6,6% çoxdur. Onların 59,3%-i əcnəbilərdir. Əsas göstərici olan adam-gecələmə sayı daha zəif inkişaf edib –2%. 2012-ci ildə gecələmə 1 640 min, ötən il 1 674 min olub. Bunun da 65,4%-i Bakının payına düşür.

İl ərzində mehmanxanaların yüklülüyü 13,5% olub. Yəni, mehmanxanaların gündəlik adam qəbul etmə imkanından az istfadə olunub və mehmanxana nömrələri əsasən boş olub.

2013-cü ildə mehmanxanaların gəlirləri 171,3 mln. manat olub. Artım 11,2%-dir. Gəlirlər nömrə satışı (64,7%) və yeməkdəndir (23,4%). Mehmanxanaların xərcləri 145,5 mln. manat olub (+31,4%). Xərclərin üçdə biri (30,5%) əmək haqqına gedib. Ötən il mehmanxanalarda işləyənlərin sayı 938 nəfər artaraq 8259-a çatıb. Mehmanxana işçiləri orta hesabla 448 manat maaş alır. --08D—