Müsavat partiyası etiraz bəyanatı yayıb

Müsavat Partiyası “NİDA” gənclər hərəkatı üzvlərinin məhkəmə prosesində dövlət ittihamçısının gənclərin uzun müddətə azadlıqdan məhrum olunması tələbinə etiraz bəyanatı yayıb.

Müəlliflər dövlət ittihamçısının bu tələbini əsassız sayıblar. Dövlət ittihamçısı gənclər barəsində yalan məlumatları təkrarlamaqla, məhkəmə araşdırmalarını saxtalaşdırmaqla gənclərə ağır cəza istəməkdə ittiham edilir. Qərar verilən zaman hətta ittihamçının öz “qurama sübutları”na əsasən əməllərin hələ cinayətə hazırlıq mərhələsində olmasının unudulduğu vurğulanır. Sənəddə bu tələbə etiraz olaraq gənclərin aclıq aksiyasına başlamaq qərarı verdikləri vurğulanır.

Sənəddə məhkəmə araşdırması zamanı müdafiə tərəfin vəsatətlərinin əksəriyyətinin qəbul olunmaması, gənclərə qarşı işgəncə faktlarının, yalan ifadələrdəki ziddiyyətlərin araşdırılmaması önə çəkilir. Məhkəmə heyətinin dövlət ittihamçısının ittihamını səsləndirərək həbs cəzası istəməsi məhkəmələrin siyasi qərar əsasında fəaliyyət göstərməsinin göstəricisi kimi dəyərləndirilir. Beynəlxalq qurumların, bəzi dövlətlərin səfirliklərinin bu məhkəmə proseslərinin siyasi sifariş həyata keçirməsi barədə açıqlamalarına baxmayaraq, ölkə məhkəmlərinin bu biabırçılıqları davam etdirdiyi əksini tapır.

Müəlliflər siyasi sifariş əsasında verilən bu məhkəmə qərarlarını əsassız sayaraq, belə qərarlar əsasında siyasi məhbusların azad olunmasını tələb edirlər.

2013-cü il martın 7-də MTN “N!DA” Vətəndaş Hərəkatı üzvü olan Bəxtiyar Quliyevi, Şahin Novruzlunu, Məmməd Əzizovu, Rəşad Həsənovu, Üzeyir Məmmədlini, Rəşadət Axundovu, Zaur Qurbanlı və İlkin Rüstəmzadəni qanunsuz və əsassız həbsə alıb. Gənclərə qarşı narkotik maddə saxlamaq, kütləvi iğtişaşlar törətmək kimi ittihamlar irəli sürülüb. -05D-