Azərbaycanda rəsmi işsizlər 5642 nəfər artıb

İyulun 1-i üçün Məşulluq Xidməti ölkədə 34 519 nəfərə işsiz statusu verib. Bunun 37,8%-i qadınlardır. Ay ərzində 478 nəfər işsiz statusu alıb, deyə Dövlətstatkom bildirir.

İlin əvvəli ilə müqayisədə işsizlərin sayı 5642 nəfər artıb. Bu, özəl müəssisələrdə iş yerlərinin bağlanması ilə əlaqədardır.

Bakıda 15 232 nəfər rəsmi işsiz var. Statistikaya inansaq, Naxçıvan MR-da işsizlər yoxdur. Nə ilin əvvəlində, nə də bu gün burda heç kəsin işsiz statusu olmayıb. Halbuki NMR-da Məşulluq İdarəsinin Naxçıvan şəhəri və 7 rayonda məşulluq mərkəzi var.

İyulun əvvəli üçün Azərbaycanda 9 min 96 nəfər işsizlik müavinəti alır. İlin əvvəlində onların sayı 1543 nəfər olub. Əmək və Əhalinin Sosial Müdafiəsi Nazirliyinin məlumatına görə, müavinətlərin orta məbləği 248,1 manatdır.

DSK-nın məlumatına görə, 1 iyul 2016-cı il üçün Beynəlxalq Əmək Təşkilatının metodologiyası üzrə ölkədə 245,2 min nəfər işsiz sayılır. İqtisadi aktiv əhalinin sayı isə 4 mln 953,1 min nəfərdir. Bu, ilin əvvəlindəkindən 37,8 min nəfər çoxdur.

Maraqlıdır ki, ötən bazar ügün dövlət başçısı bu ilin 6 ayında 78 min yeni iş yerlərinin açıldığını bəyan edib. 08B