"Azercell" 2015 Avropa Oyunlarının əsas şəbəkə təminatçısı seçilib

 Azercell Telekom 2015 Avropa Oyunlarının keçiriləcəyi stadionlar və digər əlaqədar ərazilərdə bütün müştəriləri üçün mobil rabitə sistemini təmin edəcək.

Şirkətin məlumatında deyilir ki, məhz Azercell oyunların baş tutacağı Olimpiya Stadionu və Milli Gimnastika Arenasının binalarında daxili multioperator sistemi ilə təmin edəcək. Artıq Milli Gimnastika Arenasında şirkət tərəfindən binadaxili multioperator sistemi quraşdırılıb.

"Binadaxili multioperator sistemi ona bir və ya bir neçə operatorun eyni zamanda öz radio baza stansiyasını qoşmağa imkan verir. Qeyd olunan məkanlarda bu sistem Azercell Telekom tərəfindən təmin edildiyinə görə, qeyd olunan məkanlarda digər mobil operatorlar yalnız Azercell-in quraşdırdığı sistem üzərindən çalışacaq", - deyə informasiyada qeyd edilir.

Azercell, həmçinin, Olimpiya yolu və olimpiya kəndlərində 20-ə yaxın yeni Radio Baza Stansiyalarını yerləşdirməyi planlaşdırır. Bu da idmançılara yaşayış və məşq etdikləri zonalarda güclü şəbəkədən yararlanmaq imkanını verəcək. Bunlarla yanaşı, oyun iştirakçılarının istifadə etdikləri nəqliyyat vasitələri də güclü şəbəkə ilə təmin olunacaq. Bu məqsədlə Azercell tərəfindən mobil Radio Baza Stansiyalarının quraşdırılması da planlaşdırılır. Bunlardan əlavə, olimpiya oyunları ərəfəsində paytaxt Bakı və regionlar güclü 3G və 4G şəbəkəsi ilə təmin ediləcək.

Qeyd edək ki, ilk Avropa Oyunları məhz Azərbaycanda keçiriləcək. Yarışmaya Avropa Olimpiya Hərəkatının 49 üzv ölkəsindən 5400-dən çox nümayəndə qatılacaq. Onlar yüngül atletikadan tutmuş güləş, taekvondo, boks, voleybol, basketbol, çimərlik futbolu, cüdo və s. daxil olmaqla 19 idman növü üzrə yarışacaq. --17D—