"Azərpoçt" MMC-də oğurluq

"Azərpoçt" MMC-nin Kürdəmir rayon filialının vəzifəli şəxsləri həbs edilib.

Baş prokuror yanında Korrupsiyaya qarşı Mübarizə Baş İdarəsi "Azərpoçt" Məhdud Məsuliyyətli Cəmiyyətinin Kürdəmir rayon filialının mərkəzi poçt şöbəsinin vəzifəli şəxsləri tərəfindən yol verilmiş qanun pozuntuları ilə bağlı başlanmış cinayət işinin istintaqını yekunlaşdırıb. “Onlara qarşı Cinayət Məcəlləsinin 179.3.2-ci (mənimsəmə) maddəsində nəzərdə tutulan ittiham elan edilib”., - deyə Baş Prokurorluğun mətbuat xidməti bildirir.

İstintaq müəyyn edib ki, filialın mərkəzi poçt şöbəsinin müdiri Elsevər Usubov qulluq mövqeyindən istifadə edərək filialın əməkdaşı Zaur Cəbrayılov ilə əlbir olub vətəndaşlara ünvanlı dövlət sosial yardım ödənişlərini həyata keçirmək üçün sərəncamına verilmiş pul vəsaitlərinin sərf edilməsinə dair hesabata tamah niyyəti ilə bilə-bilə yalan məlumatları daxil etməklə yekun rəqəmlərin qəsdən şişirdilməsi hesabına yaranmış 12 min 105 manat məbləğində özgə əmlakını mənimsəyib.
İstintaq dövründə dəymiş ziyanın qismən ödətdirilməsi təmin olunub. Cinayət işinin istintaqı tamamlanaraq baxılması üçün aidiyyəti üzrə Lənkəran Ağır Cinayətlər Məhkəməsinə göndərilib.

Azərbaycanda korrupsiya faktları üzrə kiçik icraçılar cəzalandırılır. Prokurorluq müstəqil KİV-in çağırışlarına məhəl qoymur və iri inhisarçıları istintaqa cəlb etmir. Qanuna görə, material dərc ediləndən 10 sutka ətzində oğurluq barədə işin istintaqı başlanmalıdır. --17D—