Bakı İH ətraf mühitə etinasız yanaşır, ekoloq düşünür

5 iyun Dünya Ətraf Mühitin Mühafizəsi günüdür. Bununla bağlı «Ekoloji Proqnoz Mərkəzi»nin sədri Telman Zeynalov mətbuat konfransı keçirib və Bakı ŞİH-i ətraf mühitə etinasız münasibətə görə qınayıb.

Onun sözlərinə görə, Bakının yaşıllaşdırılmasında onun iqlim və torpağı üçün xarakterik olmayan ağaclardan istifadə edilir və onlar quruyur. Məsələn, bir neçə il əvvəl evkalipt ağacları basdırılmışdı. Onlar qurudu, dövlətin pulunu havaya sovuranlar isə cəzasız qaldı. Bundan başqa, bir çox idxal edilən ağaclar insan üçün təhlükəli keçici xəstəliklər gətirir. 

Zeynalov deyib ki, Bakı ŞİH məişət tullantılarının idarə edilməsinə səhlənkar yanaşır. «Küçə və səkilərdə zibil qabları qoyulub. Vətəndaşlar zibili müvafiq qutuya atır. Amma İH-nin kommunal xidməti onları bir yerə yığıb Balaxanı zibilliyinə göndərir. Belə olan halda onların çeşidlənməsinin nə mənası?», deyə o soruşur. 

Hər yer plastik butulkalarla doludur. Ekoloq hesab edir ki, Coca Cola, Pepsi və başqa şirkətlər istifadə edilmiş taraları qəbul məntəqələri yaratmalı, utilizasiya və təkrar emalla məşğul olmalıdır. Zeynalov deyib ki, şəhər drenaj və kanalizasiya infrastrukturu yağışa hazır deyil. Hər dəfə leysan yağanda şəhər təsərrüfatı üçün fəlakət yaşanır.  08С