Bakıda 3-cü Azərbaycan-Bavariya biznes forumu keçirilib

Bu gün Bakıda 3-cü Azərbaycan-Bavariya biznes forumu keçirilib. İlk belə forum 2008-ci ildə olub. Bu il forum rekord sayda Bavariya sahibkarı toplayıb. 

Bavariyadan 26 şirkətin təmsilçiləri ilə yanaşı, hökumət nümyəndə heyəti də gəlib. Onları Almaniyanın ölkədəki səfiri Heydrun Tempel, İqtisadiyyat və Sənaye Nazirliyi şöbə müdirinin müavini Hüseyn Paşayev salamlayıb. 

Bavariya vilayətinin İqtisadiyyat, Mətbuat, Enerji və Texnologiya Nazirliyinin rəsmi nümayəndəsi xanım Ulrike Volf vilayətin iqtisadi imkanları barədə təqdimat keçirib. Onun sözlərinə görə, Azərbaycanla xarici ticarət dövriyyəsinin çdə biri Bvariyaya məxsusdur. Azərbaycan MDB ölkələri arasında Bvariyaya ixracatda üçüncüdür. Azərbaycanda çalışan Almaniya şirkətlərinin üçdə biri Bavariya ilə bağlıdır. «Bavariya təkcə Siemens, BMW və başqa iri şirkətlər deyil. Bavariyada kiçik və orta sahibkarlıq 99% paya malikdir. Vilayətdən ixracatın 52%-i onların payına düşür», deyə o, qeyd edib. 

Münhen və Yuxarı Bavariyanın Sənaye və Ticarət Palatasının vitse-prezidenti Stefani Spinner-Köniq Azərbaycanla ticarət-iqtisadi münasibətlərin genişləndirilməsi imkanından danışıb. Azərbaycanın investisiya və işgüzar imkanları barədə AZPROMO təmsilçisi Azər Hüseynov danışıb. Forum öz işini Azərbaycan və Bavariya sahibkarlarının ikitərəfli görüşləri ilə davam etdirib. Bavariya şirkətləri əsasən tikinti və infrastruktur, qida sənayesi, kənd təsərrüfatı, maliyyə, enerji və kimya sənayesini təmsil edir. 

Bu gün Bavariyadan olan nümayəndələr Energetika,  İqtisadiyyat və Sənaye nazirliklərində olublar. Bavariya sahibkarlarına sənaye və texnologiya parklarının yaradılmasında iştirak təklif edilib. Bavariyalılar Bakıya Tbilisidən gəlib. Orda da biznes forum keçirilib. 08C