Məhkəmə cərimələri həll olunmasa yardım olmayacaq

KİV-ə Dövlət Dəstəyi Fondunun “Azadlıq” qəzetinə maliyyə yardımını dayandırması güclü rezonansa səbəb olub.

Qəzetin redaktoru Rahim Hacıyev bu addımı bu ilki prezident seçkilərindən sonra qəzetə qarşı başlanan çoxvariantlı təzyiq kampaniyasının bir qolu adlandırıb. R.Hacıyev qəzetin məhkəmələr tərəfindən astronomik həddə cərimə olunması, “Qasid” yayım frrmasının qəzetə olan 60 min mant borcunu ödəməməsi, qəzetin satışına maneələr yaradılması, bank hesabına həbs qoyulması kimi təzyiq formaları olduğunu göstərib. Redaktora görə, Fondun maliyyə yardımını dayandırması bu təzyiqin daha bir şəklidir. Amma R.Hacıyev Fondun maliyyə yardımını dayandırmasının səbəblərini araşdırmaq üçün quruma müraciət etmədiyini söyləyib.

KİV-ə DDF-nin icraçı direktoru Vüqar Səfərli maliyyə yardımının siyasi səbəblə dayandırılması haqda iddiaları əsassız sayıb. O, “Azadlıq” qəzetinin müxalif yönlü olmasının da, Fond fəaliyyətə başladıqdan bu yana bu qəzetə maliyyə yardımı etməsinin də fakt odluğunu bildirib. Onun sözlərinə görə, maliyyə yardımının dayandırılması qəzetin kursu ilə bağlı olsaydı, o zaman qəzet heç zaman yardım almamalı idi. V.Səfərli maliyyə yardımının dayandırılmasını sırf qəzetin məhkəmə qərarları ilə cərimə olunması ilə əlaqələndirib. Barəsində məhkəmə qərarı ilə cərimə cəzası olan mətbuat qurumlarına maliyyə yardımının dayandırılması Fondun Əsasnaməsində əksini tapır. Yəni, Fondun ayırdığı maliyyə yardımı məhkəmə cərimələrinin ödənilməsinə yönəldilə bilməz və bu, birmənalıdır. Redaksiya cərimə məsələsini həll etdikdən sonra yardımı ala bilər. 

V.Səfərli bunu da bildirib ki, bu məsələ ilə bağlı qəzetin nümayəndəsi Fonda dəvət olunub, bu haqda onlara izahat verilib. V.Səfərli qeyd edib ki, Fond hər ay qəzetə 10 (on min) min manat həcmində maliyyə yardımı göstərir. O, qəzetə yardımın oktyabr ayından dayandırıldığını söyləyib. Redaksiya bu il dekabrın sonuna kimi cərimə məhkəmə məsələsini həll edə bilməsə, o zaman qəzetə yardım üçün nəzərdə tutulan 30 min manatı ala bilməyəcəyini deyir. Həmin vəsait dövlət büdcəsi olaraq növbəti ilə keçirilmir, büdcəyə qaytarılır. V.Səfərli qəzetin bu ilin mayında da məhkəmə cəriməsi olduğunu, amma yardım alması məsələsinə də toxunub. O deyib ki, o zaman qəzet məhkəmə məsələsini həll edə bildi və ondan sonra yardımı ala bildi.

Məsələ ilə bağlı Mətbuat Şurasının sədri Əflatun Amaşovun rəyini öyrənmək üçün əlaqə saxladıqda Şura sədri bir qədər sonra əlaqə saxlamaq vədi versə də, sonradan zənglərə cavab verməyib. -05B-