Beynəlxalq donorlar: Azərbaycanın aqrar sektorunun dəyər zəncirlərinin yaradılmasına ehtiyacı var

Azərbaycan kənd təsərrüfatın inkişafıan kömək üçün beynəlxalq donor təşkilatlarının nümayəndələri ilə görüşləri davam etdirir. Bu görüşlərdə əsas tezis kənd təsərrüfati istehsalında dəyər zəncirinin yaradılmasıdır. Bu barədə Kənd Təsərrüfatı Nazirliyinin məlumatında bildirilir.

«2014-cü ildə Azərbaycanın 4 strateji məhsulunun dəyər zənciri təhlil edilib. Təhlil nəticəsində çay, giləmeyvə, ipək və çaxır kimi strateji məhsulların dəyər zəncirinin inkişafı üçün təhsil, tədqiqat, məsləhət sistemi, subsidiyalar və vergi sisteminin qarşılıqlı şəkildə inkişafı üçün dövlət tərəfindən hüquqi çərçivədə önəmli addımların atılmasına ehtiyac duyulduğu müəyyən edilib”, -deyə Avropa İttifaqının Azərbaycandakı nümayəndəliyinin  layihə rəhbəri Olaf Haydelbax bildirib.

Beynəlxalq ekspert Martin Mautner Markhofun fikrincə, bazara  məhsul çıxarmaq üçün satış kanallarını tapmaqda çətinlik çəkən fermer ilə xammal tapmaqda problemlərlə üzləşən emaledicini birləşdirmək vacibdir. “Kənd Təsərrüfatının Rəqabətliyinin Gücləndirilməsi” layihəsinin məsləhətçisi Martin Mautner Markhof qeyd edib ki, layihə qarşısına qoyduğu məqsədə nail olsa, fermerlər ilə emaledicilər arasında məhsuldar əməkdaşlıq formalaşacaq. Bu da kənd yerlərində gəlirlərin əmələ gəlməsi və inkişafı prosesini sürətləndirəcək, qida sektorunda idxalın yerli məhsullarla əvəz olunmasına səbəb olacaq və müxtəlif dəyər zəncirlərinin inkişafı üçün yeni texnologiyalar tətbiq etməyə imkan yaradacaq.

Donorların görüşündə diqqət çəkilən daha bir məsələ də “Kənd təsərrüfatı kreditləri və sığorta mexanizmləri” olub. Bu məsələnin həlli üçün Frankfurt biznes və maliyyə məktəbi ilə əlaqə yaradılıb, KTN Kənd Təsərrüfatı Layihələri və Kreditlərinin idarə edilməsi üzrə Dövlət Xidmətinin rəisi Rüfət Rüstəmzadə bildirib.

Donorların görüşündə DB, Aİ, AİB, GIZ, USAID və FAO-nun nümayəndələri iştirak edib.  -08D-