Birinci rübdə özəlləşdirmə prosesinin gedişi müzakirə edilib

 2013-cü ilin I rübündə özəlləşdirilən torpaq sahələrinin sayı satılan kiçik özəlləşdirmə obyektlərinin – müəssisə və avtonəqliyyat vasitələrinin sayına çatıb. 

“Böyük” özəlləşdirmənin dayanması fonunda torpaq satışı Əmlak Məsələləri Dövlət Komitəsinin prioritetlərindən olub. Qurum bu torpaqların siyahısını ictimaiyyətdən gizləyir. 

Bu ilin I rübündə özəlləşdirilən obyektlərin altında olan 220 torpaq sahəsi satılıb. Bu barədə 30 apreldə ƏMDK kollegiyasında bildirilib, deyə qurumun mətbuat xidməti məlumat verir. 

Bir qayda olaraq, torpaq satışı gizli olur -  minoritar payçılar və investorlar xəbər tutmur. Bir çox SC-lərdə səhmdarlar obyektlərin altında olan torpaqların satılıb-satılmadığını barədə məlumat ala bilmir. Obyektlərin altında olan torpağın normativ qiyməti bazar qiymətindən çox ucuzdur və bu, korrupsiya ilə nəticələnir. Məsələn, «Bakı Təmir Tikinti» ASC-də 2,5% səhm sahibi Vüqar İsmayılovun sözlərinə görə, ümumi yığıncaqda saxta protokol tərtib edilib, guya SC-nin altındakı 1,5 ha torpağın özəlləşdirmə və icarəsindən imtina edilir. Sonrakı mərhələdə ƏMDK bu torpağın sotunu 400 manata satıb. Bu, real qiymətdən 10 dəfə aşağıdır. Ona görə səhmdarlar SC rəhbərini məhkəməyə verib. 

2013-cü ilin I rübündə həmçinin 270 kiçik müəssisə və obyekt, avtonəqliyyat vasitələri özəlləşdirilib. 229 qeyri-yaşayış sahəsi və 255 obyektin torpaq sahəsi icarəyə verilib. Hərraclarda 16 SC-nin səhm paketi satılıb. --08B—