Büdcə sisteminə düzəliş bələdiyyələrə təsir edəcək

Prezident İlham Əliyev büdcə sistemi haqqında qanuna düzəlişi imzalayıb. 1 yanvar 2015-ci ildən yerli özünüidarə orqanlarına vergilər üzrə nağd hesablaşmalar qadağan edilir. Yerli vergilər bank və «Azərpoçt» vasitəsilə ödəniləcək. Beş gün ərzində bələdiyyələr vergi və ya başqa yığımlar üzrə informasiya verməlidir.

Bələdiyyələrə dotasiya verilməsində də dəyişilik var. Dotasiya verilın zaman ərazidə yaşayanların sayı, maliyyə resurslarının yaranmasında onların payı nəzərə alınacaq. Həmçinin bələdiyyələrin cəbhə xəttinə yaxınlığı, yüksək dağ əraziləri, əhalinin yaşayış səviyyəsi nəzərə alınacaq.

Dövlət büdcəsindən sosial, ekoloji, iqtisadi və başqa proqramlar üçün tələblər də müəyyən edilib. Bələdiyyələr və ya onların təsis etdiyi strukturlar əvvəlki büdcə ilinin 15 martına kimi müvafiq ərizəni səlahiyyətli icra orqanına verməlidirlər. Müraciətə 30 günə baxılacaq. Qəbul edilsə, 1 maya kimi texniki-iqtisadi əsaslandırma təqdim edilməlidir. Subvensiyalardan istifadə barədə hesabat növbəti büdcə ilinin 15 fevralına kimi verilməlidir.

İqtisadi Tədqiqatlar Mərkəzinin sədri Qalib Toğrul hesab edir ki, dəyişikliklərin təsiri 2016-cı ildən tez hiss edilməyəcək. Şərtlərin konkretliyi və subvensiya şəklində dövlət dəstəyi müsbət haldır, deyə o bildirib. --17D—