Büdcə vəsaitlərinin mənimsənilməsi ilin sonuna saxlanılıb

İlin 3 rübündə büdcə 1 mlrd 377,1 mln manat (ÜDM-in 3,1%-i) profisitlə icra edilib.

Maliyyə Nazirliyinin məlumatına görə, 1 oktyabr üçün dövlət büdcəsinin mədaxili 14070,6 mln manat, xərcləri 12693,5 mln manat olub. Mədaxil proqnozu artıqlamasilə (+1,2%) yerinə yetirilib, xərclər 86,0 faiz icra edilib.

Neft Fondunun xətti ilə transfert (7 mlrd 399,7 mln manat (52,6%)) nəzərə alınmadan rəqəmlər belədir: Vergilər Nazirliyi tərəfindən mədaxil 5324,4 mln manat, Gömrük Komitəsindən  1 mlrd 134,9 mln manat (100,1%) olub.

Maliyyə Nazirliyinin məlumatına görə, müdafiə xərcləri 15,2%, səhiyyə xərcləri 9,2%, təqaüd və sosial müavinətlər 8,4%, mənzil və kommunal təsərrüfatı xərcləri 24,6%, təhsil xərcləri 8% artıb. Sosial yönlü xərclər 4 mlrd 19,4 mln manat (31,7%) olub. Bu, ötən ilin eyni dövründəkindən 14,9% çoxdur.

Bu ilin doqquz ayında dövlət əsaslı vəsait qoyuluşu xərclərindən elm, təhsil, səhiyyə, sosial, mədəniyyət, idman və digər sosial-mədəni və məişət təyinatlı obyektlərin tikintisinə və yenidən qurulmasına 1401,2 mln. manat, enerji, su və qaz təchizatı, nəqliyyat, kommunal, meliorasiya infrastrukturlarının tikintisinə, yenidənqurulmasına və digər sahələrə 2729,1 mln. manat vəsait yönəldilib.

Naxçıvan Muxtar Respublikasında həyata keçirilən investisiya layihələrinin maliyyələşdirilməsinə 44,4 mln. manat vəsait sərf edilib.

2014-cü ilin dövlət büdcəsinin gəlirləri 18 mlrd 384 mln manat, xərcləri 20 mlrd 63 mln manat, kəsir 1 mlrd 679 mln manat və ya ÜDM-in 2,87%-i nəzərdə tutulub. Hələlik kəsir var. Bu isə hökumət sifarişi ilə işləyən tikinti şirkətlərinin avral rejimdə keyfiyyətsiz işi ilə nəticələnəcək. --17D—