Çıxarışsız mənzilləri girov qoymaq olacaq

İlin sonuna kimi ipoteka krediti tam ödənilməyən yeni binalardakı mənzillərin girov qoyulması məsələsi həll edilə bilər.

Mərkəzi Bankın rəhbəri Elman Rüstəmov deyib ki, hazırda yeni binalarda ipoteka ilə alına evlər çıxarışı olmadığı üçün girov qoyula bilmir.

«Adamlar ipoteka krediti almaq üçün yaxın adamların mənzilini girov qoymalı olur. Ona görə dünya praktikasına əsaslanıb ilkin qeydiyyat sisteminə keçmək istəyirik», - deyə o bildirib.

Həmçinin regionlarda və gənc ailələr üçün ipoteka imkanlarının genişləndirilməsi nəzərdə tutulur.

İpoteka kreditləri Azərbaycan vətəndaşlarına, 50 min manata qədər, 25 ilədək müddətə, illik 8%-dən çox olmamaqla verilir.

Güzəştli kreditlər 35 min manatadək, 30 ilə qədər müddətə, illik 4%-dək dərəcə ilə verilir. İlkin ödəniş sosial ipotekada 15%, adi ipotekada 20%-dir.

İpoteka predmeti yalnız mənzil və ya fərdi yaşayış evi ola bilər. Kreditin məbləği kreditin verildiyi tarixə ipoteka ilə yüklü edilən daşınmaz əmlakın bazar qiymətinin 80%-dən çox olmamalıdır. İpoteka kreditləri üzrə ödəniləcək aylıq məbləğ borcalanın (borcalanların) aylıq məcmu gəlirinin 70%-dən çox olmamalıdır.

Sosial ipoteka şəhid ailələrinə, Milli Qəhrəmanların ailələrinə, məcburi köçkün və ya ona bərabər tutulan şəxslərə, üç ildən az olmayan müddətdə dövlət qulluqçusu işləyən şəxslərə, elmlər namizədi və ya doktoru elmi dərəcəsi olan şəxslərə, idman sahəsində xüsusi xidmətləri olan şəxslərə verilir.

AİF-in agentləri 30 bank, 21 sığorta və 16 qiymətləndirmə şirkətidir. --17D—