Daşınmaz əmlakın vergiyə cəlb edilməsi üzrə ictimai dinləmələr

«Şəffaflıq-Azərbaycan» Korrupsiya ilə Mübarizə İB bu gün Bakıda daşınmaz əmlakın vergiyə cəlb edilməsi üzrə ictimai dinləmələr keçirib.

Tədbir iştirakçılarının araşdırmasına əsasən, ilin I rübündə daşınmaz əmlakın  (o cümlədən torpağın) yeni mexanizmlə vergiyə cəlb edilməsindən sonra bazarda aktivlik azalıb. İlin I yarısında daşınmaz əmlakın qeydiyyatı 32% azalıb. Buna səbəb vətəndaşlar və tikinti şirkətlərinin ödədiyi verginin yüksək olmasıdır. “Dəyirmi masa”da iştirak edən Daşınmaz əmlakın Dövlət Reyestri Xidmətinin təmsilçisi bununla razılaşmayıb və qeyd edib ki, 3 rübdə daşınmaz əmlak üzrə əqdlər 5,5% artıb.

  Tədbirdə çıxış edən Vergilər Nazirliyinin şöbə müdiri Nicat İmanov bildirib ki, parlament cəmiyyətin maraqlarını nəzərə alıb oktyabrda daşınmaz əmlakın yeni mexanizmlə vergiyə cəlb edilməsini nəzərdə tutan qanun layihəsi qəbul edib. Hazırda vergi daşınmaz əmlakın alqı-satqısı üzrə əqdin həcmi nəzərə alınmaqla tutulur. Yanvarın 1-dən isə əsas meyar daşınmaz əmlakın sahəsidir. Vergi (1 kv m üçün 15 manat, zona əmsalı nəzərə alınmaqla) notariusda tutulacaq. «Şəffaflıq-Azərbaycan» ekspertlərinə görə, bu halda vergi həcmi 3 dəfə artacaq. Mənzil sahibinin 5 il yaşadığı daşınmaz əmlak obyektlərindən vergi tutulmayacaq. Bu gün həmin müddət 3 ildir.

“Dəyirmi masa”nın işində dövlət strukturları, QHT-lərin təmsilçiləri və ekspertlər iştirak edib. «Şəffaflıq-Azərbaycan» ekspertləri vergi qanunvericiliyinin təkmilləşdirilməsi üzrə tövsiyələr paketi təqdim edib. 08C