Dekabrın 6-da Bakıda Azərbaycan-İtaliya biznes forumu keçiriləcək

Dekabrın 6-da Bakı Biznes Mərkəzində İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan-İtaliya biznes forumu keçiriləcək.

İqtisadi İnkişaf Nazirliyinin mətbuat  xidmətindən Turan-a bildirilib ki, ikitərəfli görüşlər zamanı sənaye, tikinti, İKT, mebel istehsalı, mədəniyyət, turizm, bankçılıq və digər  sahələrdə əlaqələrin genişləndirilməsi imkanları müzakirə ediləcək.

İtaliyanın 30- a yaxın şirkətinin nümayəndələri tədbirdə iştirak edəcəklərini bəyan ediblər.

Azərbaycan Dövlət Gömrük Komitəsinin məlumatına görə, 2012-ci ilin 10 ayında Azərbaycandan İtaliyaya mal ixracı (əsasən neft) $4 490,6 mln. səviyyəsində qeydə alınıb ki, bu da 2011-ci ilin həmin dövrünə olan göstəricinin 55,5%-ni təşkil edir.

Həmin dövrdə Azərbaycanın ixrac strukturunda İtaliyanın xüsusi çəkisi 22,75% təşkil edib. İtaliya Azərbaycanda idxal coğrafiyasında da sanballı yer tutur (idxalın 2,5%-i). Sözügedən müddətdə İtaliyadan ümumi məbləği $190,9 mln. həcmində mal göndərilib ki, bu da 2011-ci ilin yanvar-oktyabr aylarından 0,5% azdır.--08D—