Türkiyəyə aviabiletlər bahalanıb

«Azərbaycan Hava Yolları» QSC  01 dekabr 2012-ci il tarixindən etibarən İstabul və Ankara istiqamətlərində aviabiletlərin rəsmiləşdirilməsinə görə agentliklərə verilən komisyon mükafatlandırıcı faizləri ləğv edəndən sonra bahalanma baş verib. 

AZAL-ın rəsmi məlumatında deyilir ki, bu addım “bu sahədə beynəlxalq təcrübəyə əsaslanaraq və aviabiletlərin satışı prosedurunu təkmilləşdirmək məqsədi ilə” atılıb. 

Mükafat əvəzinə aviaşirkətin avtorizə olunmuş agentlərinə bu istiqamətlərdə biletlər rəsmiləşdirilərkən ekonom sinifi aviabiletləri üçün 30 manatadək, biznes sinifi aviabiletləri üçün 80 manatadək servis yığımı tətbiq etmək tövsiyə olunub. Aviaşirkətin bir sıra digər uçuş istiqamətləri üzrə bu sxem artıq bir çox aylar ərzində müvəffəqiyyətlə fəaliyyət göstərir, deyə press-relizdə bildirilir.  

Dekabrın 1-dən Bakı-İstanbul-Bakı marşrutu ilə aviabiletlər 30 manat bahalanaraq 366 manat, Bakı-Ankara-Bakı üzrə 270 manat olub. 

Eyni zamanda, aviaşirkətdə qeyd ediblər ki, “Azərbaycan Hava Yolları” QSC-nin rəsmi veb saytından www.azal.az aviabiletlərin əldə edilməsi zamanı, sərnişinlərdən  yuxarıda qeyd olunan servis yığımı tutulmur. --08D—