Dövlət ağır sənayenin baza məhsullarının istehsalında iştirak edəcək

2014 Dekabr 29 (Bazar ertəsi) 11:35:51

Azərbaycanda 2015-2020-ci illərdə sənayenin inkişafı üzrə Dövlət Proqramı təsdiq edilib. Proqram həyata keçiriləndə sənaye iqtisadi artımın lokomotivi olacaq.

Proqramda sənayenin modernləşdirilməsi, yüksək ixtisaslı kadrlar hazırlanması nəzərdə tutulur. Nəticədə qeyri-neft sənayesinin ixrac potensialının artacağı, istehsalın genişlənəcəyi, enerjiyə qənaət ediləcəyi və  rəqabət qabiliyyətinin güclənəcəyi gözlənilir.

Sənayenin əsas vəzifəsi yerli xammal əsasında ixracın artırılmasıdır. Artıq məhsulu ixrac edən sement müəssisələri buna nümunədir. Proqram çərçivəsində ərzində metallurgiya, neft-qaz emalı, neft-kimya və kimya sahələrində müasir tələblərə uyğun yeni istehsal güclərinin qurulması zəruridir. Hökumət hesab edir ki, metallurgiya və neft-kimya sahələrində baza məhsullarının istehsalı son məhsul istehsal edən çoxlu sayda müəssisələrin yaradılmasına təkan verəcək. Bununla yanaşı, metallurgiyanın inkişafı yeni qurulmuş gəmi istehsalı sahəsinin xammal təchizatını yaxşılaşdıracaq, rəqabət qabiliyyətini yüksəldəcək, maşınqayırmanın inkişafı üçün sağlam zəmin yaradacaq. Sənəddə deyilir ki, sənaye üçün baza məhsulları istehsal edən ağır sənaye müəssisələrinin qurulmasına zərurət yarandıqda dövlətin yaxından iştirakı təmin edilməli, baza məhsullarından yarımfabrikat və son məhsul istehsalının isə özəl sektor tərəfindən icrası təmin edilməlidir.    

Dövlət sənayenin rəqabət qabiliyyətinin yüksəldilməsi məqsədi ilə enerji tariflərinin tənzimlənməsində çeviklik artırılmalı, çevik tarif siyasəti əlverişli vergi və gömrük rejimi və çevik məzənnə siyasəti ilə müşayiət edilməlidir. Həmçinin sənayeyə investisiyaların cəlb edilməsi üçün imkanlar genişləndirilməli, sənayeyə yönləndirilən dövlətin güzəştli kreditlərindən istifadə və lizinq imkanları artırılmalı, qeyri-neft sənayesinə investisiyaların təşviqi mexanizmi yaradılmalıdır.  

Dövlətin yaratdığı sənaye parkları (Yüksək Texnologiyalar Parkı, Sumqayıt Kimya-Sənaye Parkı, Balaxanı Sənaye Parkı), Polad İstehsalı Kompleksi, özəl sənaye komplekslərinin (Sumqayıt Texnologiyalar Parkı, “Det-Al” alüminium kompleksi) layihə gücündə işləyəcəyi gözlənilir. 08D