Dövlət səkkizinci ildir ki, dəzgahqayırma zavodundan qurtula bilmir

Əmlak Məsələləri Dövlət Komitəsi səkkizinci dəfə  “Dəzgahqayırma” İB-nin baş müəssisəsinin bazasında yerləşən  “Bakı Dəzgahqayırma” ASC-nin 99,7% səhminin (890300 ədəd)  satışı üzrə investisiya müsabiqəsi elan edib. 

Ötən illə müqayisədə iddiaçılar qarşısındakı şərtlər demək olar ki, dəyişməyib. Yalnız əmək haqqı üzrə borcun məbləğinin ödənilməsi üçün  həcm  24 min manatdan 17 min manatadək endirilib. 

Müasir tələblərə cavab verən metalkəsmə dəzgahlarında istehsalata nail olmaq üçün iddiaçılardan müvafiq investisiya proqramını təqdim etmək tələb olunur. Müsabiqənin qalibi dövlət büdcəsinə ən azı 600 min manat köçürməlidir.

Ərizə və təkliflər mayın 6-dək qəbul olunacaq.

Qeyd etmək lazımdır ki, investisiya müsabiqəsinin keçirilməsinə dair qərar yalnız ƏMDK-nın mətbu orqanı olan “Mülkiyyət” qəzetində dərc olunub. ƏMDK-nın saytının ingilis dili versiyasında investisiya müsabiqələrinin keçirilməsinə dair elanlar 2009-cu ildən yerləşdirilmir. 

“Bakı Dəzgahqayırma” ASC 1982-ci ildə istismara verilir. Müəssisə 9 ha sahəni əhatə edir. ASC-də 40 nəfər çalışır. Beş il ərzində işçilərin sayı 31 nəfər azalıb. Müəssisənin kreditor borcları 2013-cü il martın 1-dək 56,3 min manat, debitor borcları 23,2 min manat təşkil edib. 08D