Fevralda 1,6% inflyasiya olub

Bu ilin fevralında Azərbaycanda istehlak məhsullarının və xidmətlərin qiymətləri 1,6% artıb, deyə Dövlətstatkom bildirir.

Ərzaq məhsullarının qiymətləri 2,5 faiz, qeyri-ərzaq məhsullarının qiymətləri 0,9 faiz, əhaliyə göstərilən ödənişli xidmətlərin qiymətləri isə 1,0 faiz bahalaşıb.

DSK ay ərzində yumurtanın qiymətinin ucuzlaşmasını qeydə alıb. Ay ərzində düyünün, unun, qarabaşaq yarmasının, makaron, mal, qoyun və toyuq ətinin, balıq, kolbasa, süd məhsullarının, kərə və bitki yağlarının, şəkər və şəkər tozunun, qəhvə, çay və kakaonun, meyvə-tərvəzin, spirtli içkilərin və tütün məmulatlarının qiymətlərində bahalaşma olub.

Bəzi qeyri-ərzaq məhsullarının da qiyməti bahalanıb. Bunlar parça, geyim və ayaqqabı, inşaat materialları, mebel və ev əşyalar,  zərgərlik məmulatları, xalça və digər döşəmə örtükləri, şüşə məmulatları, yemək qabları və əşyalarının, məişət cihazları, kompüterlər, dəftərxana ləvazimatı, minik avtomobilləri və onlar üçün ehtiyat hissələri və s-dir.

İllik hesablamada iki ayda inflyasiya 12,5% olub. O cümlədən ərzaq məhsullarının qiymətləri 15,6 faiz, qeyri-ərzaq məhsullarının qiymətləri 12,5 faiz, əhaliyə göstərilən ödənişli xidmətlərin qiymətləri 8,4 faiz bahalaşıb. 08D