Gilan Tekstil Park fərdi əmək müqaviləsi bağlamadan 1000-dən çox işçi qəbul edib

Rəsmi olaraq dövlət başçısı İlham Əliyevin iştirakı ilə mayın 3-də açılan «Gilan Tekstil Park» tekstil kompleksi 1000-dən çox işçini fərdi əmək müqaviləsi bağlamadan işə qəbul edib. Şirkət 2 həftə müddətində Turan-ın bu barədə şifahi və yazılı sorğusuna cavab verməyib. 

"Vətəndaşlarımız işlə təmin olunsun deyə Azərbaycanda gözəl müəssisələr yaradılır", deyə «Gilan Tekstil Park»ın açılışında dövlət başçısı İlham Əliyev bildirib. Amma məlum olur ki, burda işçilərin elementar haqqı pozulur. İşçilərin sözlərinə görə, qadınlar arasında işsizlik yüksək olduğu üçün işləmək istəyənlər çoxdur. Ötən ilin sonunda yüzlərlə işçi haqqı ödəilməyən təcrübə dövrünə qəbul edilib. «Əmək müqaviləsinin adını çəkənlərə qapını göstərirlər». İş səhər saat 8-də başlayıb axşam 6-da bitir. Nahar fasiləsi yarım saatdır. İşçiləri hətta şənbə günü də işləməyə məcbur edirlər. 

Açılışda İlham Əliyev deyib ki, işçilər yüksək maaş alır. Amma bu, doğru deyil. Orta aylıq maaş 57 saatlıq iş həftəsinə və ölkə üzrə orta aylıq 400 manata rəğmən 250 manatdır. Türkiyədən cəlb edilən menecment yaxşı maaş alır. Onların iş müddəti başa çatır və idarəçilik yerlilərə veriləcək. Məlum deyil, əcnəbi işçi qüvvəsi cəlb etməyə görə dövlətdən pullu icazə alınıbmı? 

Azərbaycan Həmkarlar İttifaqları Konfederasiyasında Turan-a bildiriblər ki, qanunvericiliyə əsasən, istənilən iş müddətinə işçi cəlb edən müəssisə əmək müqaviləsi bağlamalıdır. Hesablaşma işə qəbul vaxtından başlayır. İşə qəbul olunan kimi müqavilə bağlanmalı, əmək kitabçası ən geci 5 günə verilməlidir. Görünür, bu, FHN rəhbəri K.Heydərova məxsus «Gilan Tekstil Park»a aid deyil. İşçilərə deyiblər ki, ən azı 12 ay müqavilə olmayacaq. 

Xatırladaq ki, Gilan tekstil parkı 20 ha ərazidə yerləşir. Orda toxuculuq, rəngləmə, tikiş fabriki var. Ümumi qiyməti 46 mln manat olan müəssisəyə dövlət 15 mln amnat güzəştli kredit verib. 

Burda əyirmə və toxuma fabrikləri də tikilir. Bunların tikintisi başa çatandan sonra əlavə 2 min iş yeri açılacaq. Gilan tekstil parkında 4 min nəfəri işlə təmin etmək planlaşdırılır. 

Müəssisə istismara veriləndən sonra analoji məhsulların (parça, hərbi forma, uniforma, kişi, qadın, uşaq paltarı, yataq dəsti, hamam paltarı) idxalının məhdudlaşdırılacağı gözlənilir. 

Məlum deyil, Əmək və Əhalinin Sosial Müdafiəsi Nazirliyi, Vergilər Nazirliyi və DSMF əmək və vergi qanunvericiliyinin bu ciddi pozuntusuna necə reaksiya verəcək? Onların əlləri «Gilan Tekstil Park»a uzana biləcəkmi?