Hələlik Azərbaycanda ölkəboyu pulsuz wi-fi gözlənilmir

Bakı/23.04.18/Turan: Avropa komissiyası Aİ ərazisində, eləcə də Norveç və İslandiyada pulsuz İnternetə girişi təmin etmək qərarına gəlib. İlkin mərhələdə wi-fi-ötürücüləri ilə 1000 yaşayış məntəqəsi təchiz ediləcək. Onların hər biri Avropa büdcəsindən 15000 avro alacaq. Aİ üzvü olmağa can atmayan Azərbaycanda bütün ölkə boyunca pulsuz İnternet yoxdur və olması gözlənilmir. Hər halda bu məqalənin müəllifi Bakıdakı Xaqani bağında (Molokan bağı) bir dəfə də olsun pulsuz İnternetdən istifadə edə bilməyib. Halbuki, bağda bu xidmət haqda elan asılıb.

"Azərbaycan əhalisi üçün pulsuz wi-fi tezliklə gözlənilmir, çünki ölkə hökuməti maliyyə baxımından buna hazır deyil. Azərbaycanın bütün şəhər və kəndlərində pulsuz İnternetin olması üçün hökumət provayderlərlə müqavilə bağlamalıdır.

Təkcə məsələnin texniki hissəsinin həlli üçün 100 milyon manata yaxın vəsait lazımdır", - 2016-cı ildə "Exo" qəzeti yazmışdı.

Ayrı-ayrı yerlərdə pulsuz İnternetlə bağlı vəziyyət necədir?

Bir il öncə, 2017-ci ilin martında Nəqliyyat, Rabitə və Yüksək Texnologiyalar Nazirliyindən bildirmişdilər ki, memarlıq abidələrinin olduğu yerlər pulsuz İnternetlə təmin ediləcək. "İctimai Wi-Fi" layihəsinin ilkin mərhələsi üçün adamların sıx toplaşdığı yerlər seçilib.

"Əslində müxtəlif inkişaf etmiş ölkələrdə, hətta Gürcüstanın Batumi şəhərində adi iş olan bu xidmət Bakıda Sabir bağı ərazisində, Bakı aeroportu və Bakı bulvarında uğurla həyata keçirildi", - "Pulsuz İnternet" forumunun iştirakçıları bildiriblər.

"Fəvvarələr" meydanı ərazisində wi-fi o qədər də yaxşı işləmir. Ancaq şəxsi obyektlərə, yəni kafe və restoranlara gələnlər içəri daxil olan kimi ofisiantdan İnternetə giriş kodunu soruşurlar. Oxucuların başa düşdüyü kimi, bunda da Rabitə Nazirliyinin xidməti yoxdur.

Dənizkənarı bulvar ərazisində İnternetlə təminat müxtəlif səviyyədədir. Rabitə Nazirliyinin məlumatına görə, bulvarda Çinin Huawei şirkətinin avadanlığı quraşdırılıb ki, bu da 122 nöqtədən İnternetə girişi təmin edir. Yeni sistemin effektivliyini yoxlayan forum iştirakçısı yazıb: "Dəniz vağzalından bulvara qədər normal tutur, speedtestdə sürət saniyədə 20-dən 11 mbit-ə qədər, Parkbulvardan qülləyə kimi bir qədər zəifdir, haradasa 12-dən 4 mbit.-ə qədər. Youtube açılır, layvstrim də normaldır".

Metropolitendə də pulsuz İnternet pis işləyir. Keyfiyyətli pulsuz İnternetdən danışmaq hələ tezdir, halbuki, pulsuz wi-fi hələ İslam Oyunlarından öncə çəkilib.

Çatışmazlıqlar var, ancaq "İctimai İnternet" layihəsi çərçivəsində ölkədə Access Point zonasının genişləndirilməsi üzrə iş aparılır. Layihə Rabitə Nazirliyi və "Bakı Telefon Rabitə" İB (Baktelecom) tərəfindən həyata keçirilir.

"Formula-1" yarışlarında Bakıya gələn milyonlarla turistin ehtiyacının ödənilməsinə cəhdlər var. İzmir və Nərimanov, Dədə Qorqud, Hüseyn Cavid parklarında, Dənizkənarı bulvar ərazisində, Dövlət Bayrağı Meydanı ərazisində, "İçərişəhər" Dövlət Tarix-Memarlıq Qoruğu, Heydər Əliyev Mərkəzinin parkında, Sahil, Sabir, Xaqani, Axundov bağlarında, Qış bulvarı və Zabitlər parklarında, Səməd Vurğun və Muğan Bağları parklarında pulsuz İnternet üçün avadanlıq quraşdırılıb.

Çinlilər bir neçə mürəkkəb sistem quraşdırıblar. Bu xidmətin olması və Access Point-ə qoşulma qaydası haqda məlumat isə yoxdur. Ancaq bütün hallarda xidmət pulsuz olduğu üçün dövlətin səxavətinə adət etməyən bakılılar bundan həvəslə iştifadə edirlər.

Azərbaycanın digər böyük şəhərlərində pulsuz İnternet yoxdur, hələ kənd və rayon tipli yaşayış məntəqələrini demirik.

Rabitə Nazirliyi paytaxtdankənar ərazinin hamısının pulsuz wi-fi ilə təmin olunacağını vəd etmir. Heç Bakının hər yerində də yaxın illərdə bu xidmətdən yararlana bilməyəcəklər.-0-