Hökumət bazarla yarmarkanın fərqini müəyyən edib

Nazirlər Kabineti oktyabrın 19-da 3 aprel 2014-cü ildən qüvvədə olan “Azərbaycan Respublikasında ticarət, ictimai iaşə, məişət və digər növ xidmət Qaydaları”na dəyişiklik edib. Müvafiq qərar prezidentin 16 yanvar 2014-cü il tarixli  “Kənd təsərrüfatı və ərzaq məhsulları bazarının fəaliyyətinin təkmilləşdirilməsi sahəsində əlavə tədbirlər haqqında”  sərəncamının icrası məqsədilə verilib.

Nazirlər Kabinetinin qərarına əsasən, bazar, topdansatış bazarı, pərakəndə satış bazarı, kənd təsərrüfatı məhsullarının satış bazarı, yaşıl market, fermer mağazası, yarmarka, eləcə də kənd təsərrüfatı məhsullarının və ərzaq mallarının yarmarka-satışı yerlərinə aydınlıq gətirilib. Məsələn, yaşıl marketdə bitki, bitkiçilik və heyvandarlıq məhsulları satılır. Yaşıl marketin anbarı, laboratoriyası, avtoparkı, eləcə də sertifikatlaşdırılmış ekoloji kənd təsərrüfatı məhsullarının satış yeri olmalıdır.

Fermer mağazalarında xüsusi fərqləndirici lövhələr quraşdırılmalıdır.

Hökumət yarmarkaların təşkili səllahiyyətini yerli icra hakimiyyətlərinə verib. Onlar yarmarkaların təşkili üzrə xüsusi tədbirlər planı hazırlamalıdır. kənd təsərrüfatı məhsullarının və ərzaq mallarının satış-yarmarkası Kənd Təsərrüfatı Nazirliyinin təklifi əsasında müəyyən günlərdə (şənbə və bazar günləri, bayram günləri və digər əlamətdar günlərdə) təşkil edilir. Yarmarkalarda xüsusi lövhələrdə satılan malların qiymətləri göstərilir. Bu yarmarkalar dövlət büdcəsinin vəsaiti ilə təşkil edilir. əgər yarmarkanı ayrı-ayrı şəxslər təşkil edirsə, onlar da maliyyələşdirir. 08D