Hökumət ÜDM formalaşmasında cəmiyyətin iştirakında maraqlı deyil

İyulun 9-da «Park İnn» otelində Milli Büdcə Qrupunun mətbuat konfransı olub. Tədbir ictimai büdcənin formalaşmasında cəmiyyətlə hökumətin əməkdaşlığına həsr edilib. «Sizin pullar – sizin gələcəyinizdir» layihəsi çərçivəsində keçirilən tədbiri Aİ və Oхfam (Böyük Britaniya) təşkil edib. Aİ-nin Azərbaycan təmsilçiliyinin proqram meneceri Olaf Heydelbaxın sözlərinə görə, büdcəyə nəzarətdə cəmiyyətlə hökumətin əməkdaşlığı uzunmüddətli inkişafın tərkib hissəsi və Şərq Tərəfdaşlığı proqramının vacib bəndlərindəndir. O, ölkə rəhbərliyinin formal olaraq öhdəliyi qəbul etdiyini, dövlət başçısının "2012-2015-ci illərdə açıq hökumətin təşviqi üzrə milli planı" təsdiq etdiyini bildirib. 

İqtisadi Tədqiqatlar Mərkəzinin banisi Qubad İbadoğlu hökumətin məsuliyyət daşıdığını qeyd edib. O, cəmiyyətə hesabat verməlidir. Dövlət Neft Fondu bu cəhətdən açıqdır, Hər il mədən sənayesi üzrə ümumi hesabat verilir. ARDNŞ də daxil başqa sərəncamçılar məlumatları cəmiyyətdən gizlədir. Maliyyə Nazirliyi gələn il üçün büdcəni və ötən ilki büdcənin icrası barədə rəqəmləri məxfilik şəraitində hazırlayır. 2012-ci ilin büdcəsinin icrasına isə yarım saat ayrılıb. 

Hökumət ildən-ilə beynəlxalq şəffaflıq reytinqində (Open budget survey) xal itirir –2010-cu ildə 100 mümkün baldan 43 balla 52-ci idisə, 2012-ci ildə 42 balla 58-cidir. 

İbadoğluya görə, cəmiyyətlə hökumətin mövqelərinin yaxınlaşması üçün maneələr aradan qaldırılmalıdır. Bundan başqa, vətəndaşların maliyyə informasiyalarına çıxış yolunda əngəllər var, deyə İbadoğlu qeyd edib. --17D—