İlin sonu üçün mebel üzrə 9 milli standart təsdiq üçün təqdim ediləcək

 Bu ilin sonu üçün mebel üzrə 9 milli standart təsdiq üçün Standartlaşdırma, Metrologiya və Patent üzrə Dövlət Komitəsinə (SMPDK)  təqdim ediləcək. Bu barədə qərar "Mebel sənayesi məhsulları"nın standartlaşdırılması üzrə Texniki Komitənin (TK 14) fəaliyyət planı razılaşdırılan zaman qəbul edilib.

SMPDK mətbuat xidmətində Turan-a bildiriblər ki, ilkin olaraq təhsil müəssisələrində istifadə olunan stol-stullar, uşaq çarpayısı, ofis mebeli və s. üzrə standartlar hazırlanacaq.    

Standartlar gigiyenik və funksional parametrləri əhatə edir. 

Funsional standartlar insanın antropometrik xüsusiyyətlərinə əsaslanır, müxtəlif insanlar üçün rahatlığı müəyyən edir. Gigiyenik standartlarda insan sağlamlığı ilə bağlı amillər nəzərə alınır. Ekspertlərə görə, uşaq mebelei hazırlananda gigiyenik standartların nəzərə alınması daha vacibdir, çünki məhz uşaq orqanizmi, dayaq-hərəkət aparatı pis mebeldən daha çox əziyyət çəkir. 

TK 14-ün sədri vəzifəsinə “Embawood” şirkətinin “İdeal Dizayn” ofis mebeli satışı müdirliyinin direktoru Azad Həmdullazadə təyin edilib. Komitəyə həmçinin sənaye və energetika, ekologiya və təbii ehtiyatlar, səhiyyə nazirliklərinin, Memarlıq və İnşaat İnstitutunun, “Keyfiyyət Assosiasiyası” ictimai birliyinin, “Bazar Ticarətinin İnkişafı” gənclər assosiasiyasının təmsilçiləri daxildir. --08D—