İnvestorlar İnternetə vəsait qoymaqdan qorxmamalıdır

Bu gün Four Seazons otelində «İnternet-biznes üçün investisiya mühiti və investisiya imkanları» adlı konfrans keçirilib. İnternet Forum və StartUp-un təşkil etdiyi tədbir Rabitə və İnformasiya Texnologiyaları Nazirliyinin dəstəyi ilə baş tutub. Baş sponsor Bakcell-dir. 

İnternet Forumun prezidenti Osman Gündüzün sözlərinə görə, qonşu ölkələrin təcrübəsi göstərir ki, infrastruktur və yaxşı investorlar olanda internetdə yaxşı pul qazanmaq olar. Azərbaycanda investorlar sürətli pul dalınca qaçır. Ona görə internet ənənəvi biznes növlərindən geri qalır. 

Bu sahədə start imkanı daha yaxşıdır – icarə haqqı ödəmək, fond bazarlarında təmsilçilik və s. ehtiyac yoxdur. İnternet vasitəsilə əqdlərdə gəlirlilik yüksəkdir, amma bunun üçün çoxlu bilik lazımdır. 

RİTN şöbə müdiri Elçin Zeynalov deyib ki, sahibkarlığın az mənimsənilən sahələrinə ilk addımı, adətən, hökumət atır. Prezidentin sərəncamı ilə RİTN yanında İnformasiya Texnologiyalartının İnkişafı Fondu haqda Əsasnamə təsdiq edilib. Həmçinin kredit verilməsi, investisiya, kapitalda iştirak barədə qaydalar təsdiq edilib. Qrantlar start up layihələr üçün veriləcək. 

Bundan başqa, yüksək texnologiyalar parkının iştirakçıları 7 il müddətinə vergi və gömrük rüsumundan azad ediləcək. Gələcəkdə fiskal və monetar güzəştlər də nəzərdə tutulur. --17D—