İSB-nin investisiya prioritetləri

Bakıda VII Azərbaycan Beynəlxalq Sığorta Forumu keçirilir.

İcbari Sığorta Bürosunun (İSB) icraçı direktoru Elxan Quliyev çıxışında bildirib ki, Ilin sonuna kimi İSB-nin investisiya portfeli 34 mln manata çatacaq. Onun sözlərinə görə, ötən il perspektivli istiqamətlərə sərmayələr bir dəfə yarım artıb. Riskləri minimallaşdırmaq məqsədilə potfelin vəsaitləri manat, dollar və avroda yerləşdirilib.

O həmçinin deyib ki, icbari sığorta çərçivəsində tariflərin artırılmasına ehtiyac yoxdur. “Elə ölkələr var ki, orada zərərlilik 98-99%-dir. Bizdə nəzərəçarpacaq dərəcədə aşağıdır".

"Əsas problem icbari sığorta ilə məşğul olan şirkətlərin ödədiyi artıq komisyon haqları, endirimlərlə bağlı idi. Bununla əlaqədar da Maliyyə Bazarlarına Nəzarət Palatası lazımi tədbirlər görür. Artıq normal işləmək mümkündür”, - deyə İSB rəhbəri əlavə edib.

Məmur sonrakı investisiyalara da toxunub. 4-5 iyulda Palata rəhbərliyi ilə birgə avtonəqliyyat vasitəsi sahiblərinin mülki məsuliyyətinin icbari sığortası üzrə zərərlərin qiymətləndirilməsi ilə məşğul olan "Audatex Azerbaijan” şirkətinin nizamnamə kapitalındakı 5% həcmində iştirak payının İSB tərəfindən alınması ilə bağlı şirkətin rəhbərliyi ilə görüşüb. Bu, ilk danışıqlar deyil. Ötən il də gündəlikdə olub, amma razılıq əldə edilməyib. 

Audatex Azerbaijan İSB bazasında “Audatex (Schveiz) GMBH” və “Sidexa” şirkətləri tərəfindən yaradılıb və 2015-ci ilin martın 12-də dövlət qeydiyyatına alınıb. --17D—