İyulda BBVB-da hərrac həcmi 38% artıb

Bakı Banklararası Valyuta Birjasının (BBVB) valyuta bölməsində hərrac həcmi 2013-cü ilin iyulunda $65 mln və ya 50,974 mln manat olub. Bu, ötən ayla müqayisədə 37,6% çox, 2012-ci ilin iyulu ilə müqayisədə 25,7% azdır. 

USD/AZN_TOD aləti üzrə hərrac həcmi 46,262 mln manat və ya dollar ekvivalentində 59,000 mln, Swap_USD/AZN_TOD_1Week aləti üzrə dövriyyə 4 712 400 mln manat və ya dollar ekvivalentində 6,0 mln olub. Manatın ABŞ dollarına nisbətdə orta ölçülmüş məzənnəsi 1 USD üçün 0,7854 AZN təşkil edib.

Hesabat dövründə hərracların birja elektron sistemində hər bir əqdin orta həcmi USD/AZN üzrə $2,241 mln, orta günlük dövriyyə $2,826 mln olub. 

2013-cü ilin iyulunda BBVB valyuta bölməsinin hərraclarında 11 bank iştirak edib. Hesabat ayında BEST-də 46 hərrac sessiyası keçirilib və 29 əqd qeydiyyata alınıb. 

7 aylıq birja valyuta dövriyyəsi 286,42 mln manat olub. Bu, ötən ilin eyni dövründəkindən 36,8% azdır. 

Milli valyutanın birja məzənnəsi hesabat ayında 0,05% düşərək  1 USD üçün 0,7835 olub. İyulda manatın ABŞ dollarına nisbətdə orta ölçülmüş məzənnəsi 1 USD üçün 0,7841 AZN təşkil edib. İyunda o, 0,7843 AZN idi. 2013-cü il iyulun yekununda Mütəşəkkil Banklararası Kredit Bazarında ümumi hərrac həcmi manat ekvivalentində 2 mln olub. 

2013 -cü ilin iyul ayında market meyker bankların 90 günlük Bakibor kreditlərinə sifarişlərinə əsasən nəzərdə tutulan orta aylıq faizli tarif manatla illik 10,25% və ABŞ dolları ilə illik 11,24% təşkil edib. 90 günlük BakiBİD tarifi manatla illik 4,38% və ABŞ dolları ilə 4,23% olub.—15D--