Kapital Bank Bakıxanov qəsəbəsindəki bankomatlarla bağlı məlumata aydınlıq gətirdi (YENİLƏNİB)

Kapital Bank Bakıxanov qəsəbəsində yaşayan müəllimlərin maaşlarını guya bu bankın bankomatları vasitəsilə ala bilməməsi barədə contact.az saytında yayılmış məlumata aydınlıq gətirib.

Bankın açıqlamasında qeyd edilir ki, Kapital Bankın Bakıxanov qəsəbəsindəki bankomatlarından yalnız birinin fəaliyyətində 7 iyul tarixində texniki problem üzündən qısamüddətli fasilə yaranıb. Problem bir neçə saat ərzində aradan qaldırılıb və bankomatın fəaliyyəti bərpa olunub. 

Hazırda Kapital Bankın Bakıxanov qəsəbəsi ərazisindəki bütün bankomatları normal rejimdə çalışır. Bu bankomatlar vasitəsilə nağd vəsait əldə etmək, həmçinin digər bank əməliyyatları aparmaq mümkündür.

Açıqlamada müştərilərə belə texniki problemlərlə qarşılaşarkən bu barədə dərhal bankın 196 nömrəli müştəri xidmətinə məlumat vermək və Kapital Bankın ərazidəki digər bankomatlarından istifadə etmək tövsiyə olunur.

2014 İyul 09 (Çərşənbə) 14:10:51

 Bakıxanov qəsəbəsində yaşayan müəllimlər KapitalBankın bankomatlarından maaş ala bilmirlər. Maaş onların hesabına köçürülüb, amma nağd pul problemi var. 

Xidmət inhisarlaşıb və büdcəçilərin maaş və pensiyalarını ABB və KapitalBankın plastik kartları ilə verirlər. Məsuliyyət onların üzərinə düşür, deyə "İqtisadi Təşəbbüslərə Yardım" İB-nin eksperti Samir Əliyev bildirir. Onun sözlərinə görə, hər iki bankın DSMF və hökumətlə maaşın tam və vaxtında ödənilməsi barədə müqaviləsi var.

Əmək Məcəlləsinə görə, maaş təşkilatın kassasında və ya bank hesabına köçürülməklə verilə bilər. Amma praktikada alternativ yoxdur. Dünya praktikasına əsasən, pul vəsaitlərinin bank hesabına köçürülməsi barədə fərdi və kollektiv müqavilə olmalıdır. Əmək müqaviləsinə əlavə saziş də bağlana bilər.

İşəgötürənin əməkdaşlara ödənişi plastik kartla həyata keçirməsi üçün işəgötürən yazılı razılıq verilməlidir. Əgər kimsə imtina etsə, işəgötürən onu məcbur edə bilməz. Bu halda maaş kassa vasitəsilə verilməlidir. Azərbaycanda bu qaydalar işləyirmi? --17D—